Pohvistnevo

Pohvistnevo (ven.: По́хвистнево, čuv.: Похвиҫнӗ, tot.: Похвистнево / Котлыгош) om Venäman lidn Samaran agjan päivnouzmas. Se om Pohvistnevon lidnümbrikon administrativine keskuz, om Pohvistnevon rajonan administrativižeks keskuseks mugažo, ei mülü sihe.

Pohvistnevo
Похвистнево

Lidnanznam	Flag
Valdkund	Venäma
Eläjiden lugu (2017)	28,223 ristitud
Pind	64,77 km²
Pämez'	Sergei Popov (kül'mku 2015—)
Telefonkod	+7−84 656-xx-xxx
Avtokod	63, 163
Aigvö	UTC+4 (MSK+1)

Istorii

Eländpunktan aluz om pandud vn 1888 8. päiväl sügüz'kud kuti žilo raudtestancijanno udel «Samar — Uf»-keskustal. Avaitihe kivivoin löudmižsijid rajonas, i radnikžilo sai lidnan statusad vn 1947 19. päiväl elokud.

Pohvistnevo šingotase mašinansauvomižen tegimel (pörutüged, piikezrad, pol'vvärtmuded), sauvondmaterialiden tegimel, sömtegimištol (lihan ümbriradmižen tegim, jauhtegim), kombisömän tegimel i vagonkohenduzedheotandal.

Geografijan andmused

Lidn sijadase Sur' Kinel'-jogen hural randal (ven.: Большой Кинель, Samar-jogen oiged ližajogi), 80 m ü.m.t. keskmäižel korktusel, vedase läz 10 km pidust' joged. Röunatab Orenburgan agjanke päivnouzmas. Matkad Samarhasai om 142 km päivlaskmha-suvipäivlaskmha orhal, 153 km avtotedme vai raudtedme. Lähembaine lidn om Buguruslan (Orenburgan agj) 11 km päivnouzmha röunhasai orhal vai kaikil teil.

Oktäbr'skii-žilo (1033 rist. vl 2017) mülüb lidnümbrikho Pohvistnevon ližaks.

Eläjad

Vn 2010 Venäman rahvahanlugemižen mödhe lidnan eläjiden lugu oli 28 169 ristitud, lidnümbrikon — 29 261 ristitud. Vspäi 1989 lidnan ristitišt om kaikiš suremb i vajehtase 27..28 tuhad eläjid röunoiš (28 600 rist. vl 1996). Kaik 29 256 ristitud elihe lidnümbrikos vl 2017.

Rahvahad (2010): venälaižed — 66,3%, čuvašalaižed — 11,7%, totarlaižed — 11,1%, mordvinalaižed — 6,3%, ukrainalaižed — 1,1%, saksalaižed — 1,0%, toižed rahvahad — 2,5%.

Professionaližen opendusen aluzkund om Pohvistnevo-lidnan gubernine kolledž.

Irdkosketused

• Lidnan oficialine sait (pohgor.ru). (ven.)