Otradnii

Otradnii (ven.: Отра́дный) om Venäman lidn da lidnümbrik Samaran agjan päivnouzmas. Se om agjan seičemenz' lidn eläjiden lugun mödhe.

Otradnii
Отрадный

Lidnanznam	Flag
Valdkund	Venäma
Eläjiden lugu (2021)	46,984 ristitud
Pind	53,6 km²
Pämez'	Vladimir Čihirev (kezaku 2024—, velgusentäutai)
Telefonkod	+7−84 661-xx-xxx
Avtokod	63, 163
Aigvö	UTC+4 (MSK+1)

Istorii

Ezmäižed eländpunktad mainitasoiš lidnan territorijal vspäi 1770. Nügüdläižen eländpunktan aluz om pandud vn 1946 kivivoin basseinanno. Se sai lidnan statusad vl 1956.

Otradnii šingotase kivivoin da sen gazan ümbriradmižel, mašinansauvomižel (burauduzmašiništon tegim), sauvondmaterialiden pästandal (topling, Tarkett-linol', kuidmaterialad), sömtegimištol (leibtegesed, lihan pol'fabrikatad, konditerine südäin), mugažo omblendfabrik radab.

Geografijan andmused

Lidn sijadase Sur' Kinel'-jogen hural randal (ven.: Большой Кинель, Samar-jogen oiged ližajogi), 55 m ü.m.t. keskmäižel korktusel. Om ümbärtud Kinel'-Čerkassin rajonan territorijal kaikiš polišpäi.

Matkad Samarhasai om 84 km päivlaskmha orhal, 93 km avtotedme vai raudtedme. Lähembaižed lidnad oma Pohvistnevo 59 km pohjoižpäivnouzmha orhal, 63 km avtotel vai raudtel, Neftegorsk 65 km suvhe orhal vai 82 km avtotedme, i Kinel' 51 km päivlaskmha-suvipäivlaskmha orhal, 60 km avtotedme vai raudtedme. Raudtestancii om Novootradnai (ven.: Новоотрадная) lidnan suves, «Samar — Uf»-keskustal.

Tobmuz

Otradnii om lidnümbrikon üks'jäižeks eländpunktaks. Eländfartaloiden pind om läz 10 km².

Lidnümbrikon tobmuden pämez' om sen Administracijan pämez'. Edeližed lidnümbrikon pämehed oma Aleksandr Mecker (keväz'ku 2023 — kezaku 2024), Aleksandr Bugakov (reduku 2015 — reduku 2022). Lidnan Duman ezimez' om Aleksandr Kandrahin vn 2015 redukuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 48 356 ristitud, vn 2021 — 46 984 ristitud. Kaik 47 542 eläjad oli lidnas vl 2017. Kaikiš suremb lidnan ristitišt oli enamba 53 tuhad eläjid vll 1996−2001 (53 700 rist. vl 1998).

Rahvahad (enamba 0,4 % vl 2010): venälaižed — 86,1 %, mordvinalaižed — 3,9 %, totarlaižed — 2,2 %, čuvašalaižed — 2,0 %, ukrainalaižed — 1,4 %, saksalaižed — 1,0 %, vaugedvenälaižed — 0,4 %, uzbekad — 0,4 %, toižed rahvahad i rahvahuden ozutandata — 2,6 %.

Ortodoksižen hristanuskondan nell' pühäpertid oma saudud lidnas: Jumalanmaman «Ihastuz da Vihtutelend»-jumalaižen kafedraline päjumalanpert' (toine prestol om ph. Panteleimon-spravitajan, om letud vll 2001−2012) i koume jumalanpertid. Islaman pämečet' om avaitud lidnas vspäi 2018.

Lapsiden opendusen aluzkundad oma kümne päivkodid (nomer 3, 4, 8..13, 15, 16), kaks' aluzškolad (nomer 2 i 4), «Garmonija»-gimnazii, koume keskškolad (nomer 6, 8, 10), čomamahtoiden škol, lapsiden da norišton sportškol. Otradnijan kivivointehnikum om lidnan professionaližen opendusen aluzkundaks.

Galerei

• 
  Jumalanmaman «Ihastuz da Vihtutelend»-jumalaižen kafedraline päjumalanpert', vn 2013 nägu
• 
  Novootradnai-raudtestancijan sauvuz vl 2009

Irdkosketused

• Lidnan oficialine sait (otradny.org). (ven.)