Žigulövsk

Žigulövsk (ven.: Жигулёвск) om Venäman lidn Samaran agjan päivlaskmas, Tol'jattin suvine ezilidn. Se om agjan kudenz' lidn eläjiden lugun mödhe, Žigulövskan lidnümbrikon administrativine keskuz.

Žigulövsk
Жигулёвск

Lidnanznam	Flag
Valdkund	Venäma
Eläjiden lugu (2020)	51,641 ristitud
Pind	60,8 km²
Pämez'	Il'ja Suhih (tal'vku 2021—)
Telefonkod	+7−84 862-xx-xxx
Avtokod	63, 163
Aigvö	UTC+4 (MSK+1)

Istorii

Ende Otvažnoje- (vspäi 1840) i Morkvaši-žilod (tetihe vspäi 1647) oliba lidnan sijas. Žigulövskan aluz om pandud vl 1949 niiden ühtištusel samha kivivoid, nimitihe Žiguli-mägiden mödhe. Radnikžilo sai lidnan statusad vl 1952. Saudihe Volgan gidroelektrostancijad vll 1950−1957 türmatud mehiden vägil, möhemba udesnimitihe Žigulövskan GES:aks. Kivivoin varad lidnan ümbrištos tuliba lophu aigan mändes.

Žigulövsk šingotase sömtegimištol (leibtegim, konditerine kombinat), farmaceftižel tegimel, elektrusen tehmižel (Žigulövskan GES), mouckiven samižel i cementan pästandal.

Geografijan andmused

Lidn sijadase Volgan Kuibiševan vezivaradimen oiktal randal, 70 m ü.m.t. keskmäižel korktusel. Eländfartalad seištas Žiguli-mägiden pohjanno. Matkad Samarhasai om 53 km päivnouzmha-suvipäivnouzmha orhal, 93 km avtotedme vai raudtedme. Lähembaine lidn om Tol'jatti Volgan vastrandal, vides kilometras pohjoižhe kaikil teil GES:an padoseinän ülähädme (mülüb Žigulövskha). Žigulövsk-stancii radab lidnan suvipäivnouzmas «Tol'jatti — Sizran'»-raudtekeskustal.

Kaik viž žilod mülüdas lidnümbrikho Žigulövskan ližaks. Lidnümbrikon pind — 94,15 km². Om ümbärtud Stavropolin rajonan territorijal, sen londuseližil kel'dtahoil.

Eläjad

Vn 2010 Venäman rahvahanlugemižen mödhe lidnan eläjiden lugu oli 55 565 ristitud, lidnümbrikon — 60 303 ristitud. Kaikiš suremb lidnan ristitišt oli 53 tuhad eläjid vl 1973 i vajehtihe 54..57 tuhad eläjid röunoiš vll 2005−2017 (57 100 rist. vl 2008). Vl 2017 kaik 54 343 ristitud elihe lidnas i 58 747 ristitud kaikes lidnümbrikos.

Rahvahad (2010): venälaižed — 90,1 %, totarlaižed — 1,7 %, ukrainalaižed — 1,6 %, mordvinalaižed — 1,3 %, toižed rahvahad — 5,3 %.

Ortodoksižen hristanuskondan kaks' jumalanpertid oma saudud lidnas: ph. Joann Kronštadtalaižen (1997−1999) i Kijevan Vladimir-mitropolitan (1999). Islaman mečet' om sauvomižes i linneb avaitud vl 2023.

Žigulövskan valdkundaline kolledž (edel 2011. vot — radiotehnine tehnikum) om lidnan professionaližen opendusen aluzkundaks.

Edeližed merad — lidnümbrikon pämehed oma Sergei Fedotov (keväz'ku 2020 — 2021), Dmitrii Holin (tal'vku 2018 — uhoku 2020).

Galerei

• 
  Nevondkundaližen aigan lidnanznam
• 
  Lapsiden čomamahtoiden škol (2008)
• 
  Žigulövskan GES, vn 2011 nägu üläbjefaspäi
• 
  Ofissauvuz (2008, ende Kivivoin samižen ohjandusen pert')
• 
  Žigulövsk-päraudtestancii vl 2015

Irdkosketused

• Lidnümbrikon Duman oficialine sait (zhigu.samgd.ru). (ven.)
• Lidnümbrikon Administracijan oficialine sait (zhigulevsk.org). (ven.)