Ostrogožsk

Ostrogožsk (ven.: Острого́жск) om Venäman lidn da lidnankund Voronežan agjan päivlaskmas. Se om Ostrogožskan rajonan administrativine keskuz, mülüb sihe. Kozakišton Ostrogožskan Slabadoiden sodapolkan keskuz.

Ostrogožsk
Острогожск

Lidnanznam	Flag
Valdkund	Venäma
Eläjiden lugu (2021)	31,699 ristitud
Pind	22 km²
Pämez'	Jevgenii Švecov (keväz'ku 2017—)
Telefonkod	+7−47 375-xx-xxx
Avtokod	36, 136
Aigvö	UTC+3 (MSK+0)

Istorii

Eländpunktan aluz om pandud vl 1652 kuti lidnuz Venäman röunal. Žilo sai makundan lidnan statusad vl 1765. «Liski — Valuikad»-raudtekeskust läbiti lidnad vl 1895. Ukrainalaižed otiba pol't ristitištos vl 1897. Toižen mail'man sodan aigan lidn oli okkupiruidud nacistoil (5. heinku 1942 — 20. viluku 1943).

Ostrogožsk šingotase mašinansauvomižen «Agregat»-tegimel (mašiništ sömtegimišton täht), sömtegimištol (leibtegim, lihakombinat, idüjauhon-suloimen edheotand) i nahkan ümbriradmižen tegimel. Ende savičuntegim, argvointegim, laudsepan tegesiden edheotand i kengiden omblendceh radoiba mugažo. Venäman avtosodavägiden palakund seižub lidnas.

Geografijan andmused

Lidn sijadase rajonan keskuzpalan suves, Tün' Sosn-jogen hural randal (ven.: Ти́хая Сосна́ 161 km pitte, Don-jogen oiged ližajogi), 110 m ü.m.t. keskmäižel korktusel. Matkad Donhasai om 15 km pohjoižpäivnouzmha, Belgorodan agjhasai om 13 km päivlaskmha orhal. Matkad Voronežhasai om 88 km pohjoižhe orhal, 113 km avtotel vai 120 raudtel. Lähembaine lidn om Liski 32 km päivnouzmha-pohjoižpäivnouzmha orhal, 57 km avtotedme vai 40 km raudtedme. Ostrogožsk-raudtestancii radab lidnan suvipäivnouzmaižel röunal.

Kaik koume žilod i koume futorad mülüdas lidnankundha Ostrogožskan ližaks. Lidnankundan pind — 192,76 km².

Eläjad

Vl 1913 lidnan ristitišt oli 23 900 eläjad. Vn 2010 Venäman rahvahanlugemižen mödhe lidnan eläjiden lugu oli 33 842 ristitud, lidnankundan — 34 851 ristitud, rajonan viž ühesandest. Kaik 32 714 ristitud elihe lidnas i 33 637 ristitud kaikes lidnankundas vl 2017. Kaikiš suremb lidnan ristitišt oli enamba 33 tuhad eläjid vl 1967 i 32..34 tuhad eläjid vll 1979−2018 (34 900 rist. vl 1992).

Rahvahad (2010): venälaižed — 97,5 %, ukrainalaižed — 1,2 %, toižed rahvahad — 1,3 %.

Ortodoksižen hristanuskondan seičeme pühäpertid oma kaičenus i saudud lidnas: ph. Tihon Donantagaižen päjumalanpert' (om saudud vl 1868), viž jumalanpertid i časoun'. Niiden ližaks Eläban Eziauguižen Stroican päjumalanpert' i kuz' jumalanpertid ei ole kaičenus.

Ostrogožskan medicinine kolledž i Ostrogožskan äiprofil'ne tehnikum oma lidnan professionaližen opendusen aluzkundoikš.

Lidnankundan tobmuden pämez' om Rahvahandeputatoiden nevondkundan ezimez'. Lidnan Administracijan pämez' om Aleksandr Kolesnikov vspäi 2012.

Galerei

• 
  Tün' Sosn-jogi lidnas (2011)
• 
  Ph. Tihon Donantagaižen päjumalanpert', vn 2011 nägu
• 
  Medicinine kolledž vl 2010
• 
  Lidnansadun verajad (2011)
• 
  Kodirandantedištandmuzei i lämoipalonvastaine palakund vl 2011

Irdkosketused

• Lidnankundan tobmuden aluzkundoiden sait (ostrogozhsk-r20.gosweb.gosuslugi.ru) i sen vanh versii (ostadm.ru). (ven.)