Buturlinovk

Buturlinovk (ven.: Бутурли́новка) om Venäman lidn da lidnankund Voronežan agjan keskuzpalan päivnouzmas. Se om Buturlinovkan rajonan administrativine keskuz da pala.

Buturlinovk
Бутурлиновка

Lidnanznam	Flag
Valdkund	Venäma
Eläjiden lugu (2021)	24,397 ristitud
Pind	37,72 km²
Pämez'	Aleksandr Golovkov (heinku 2018—)
Telefonkod	+7−47 361-xx-xxx
Avtokod	36, 136
Aigvö	UTC+3 (MSK+0)

Istorii

Eländpunktan aluz om pandud vl 1740 kuti ukrainalaižiden slabad. Mainitase vn 1829 kartal Petrovskoje / Buturlinovk-nimitusidenke (ven.: Петровское, тожь Бутурлиновка), valdoičijan Buturlinov-rodun kanzannimen mödhe. Šingotihe nahksapkoiden tehmižel 19. voz'sadan keskespäi, tehtihe millionhasai paroid vodes da möihe kaikedme Venäman imperijadme. Slabad sai lidnan statusad vn 1917 17. päiväl heinkud. Vspäi 1993 sodaaviacijan polk baziruiše lidnan röunal.

Buturlinovk šingotase raudbetontegesiden edheotandal i sömtegimištol (leibproduktoiden kombinat, pühävointegim, lihakombinat, spirttegim, likörvintegim). Om ümbärtud maižanduzrajonal (podsolnušnikan i villän kazvatand, lihamaidživatvodind).

Geografijan andmused

Lidn sijadase rajonan keskuzpalas, Osered'-jogen üläjoksmusen hural randal tobjimalaz (ven.: Осере́дь / Осеред 89 km pitte, Don-jogen hura ližajogi), 120 m ü.m.t. keskmäižel korktusel. Matkad Voronežhasai om 133 km lodeheze orhal, 180 km avtotel vai 220 km raudtel. Lähembaižed lidnad oma Kalač 54 km suvipäivnouzmha orhal vai raudtedme, 61 km avtotedme, i Pavlovsk 52 km suvipäivlaskmha orhal, 56 km avtotedme vai 59 km raudtedme. Buturlinovk-raudtestancii radab lidnan päivnouzmas sarakol «Povorino — Liski»-keskustaspäi.

Kaik koume žilod mülüdas lidnankundha Buturlinovkan ližaks: Zemledelec, Kruglii, Otradnoje, niiden ühthine ristitišt oli 96 eläjad vl 2010. Lidnankundan pind — 135,8 km².

Eläjad

Vl 1877 kaik 23 963 ristitud elihe slabadas, vl 1939 lidnan ristitišt oli 11 400 eläjad. Vn 2010 Venäman rahvahanlugemižen mödhe lidnan eläjiden lugu oli 27 208 ristitud, lidnankundan — 27 304 ristitud, rajonan viž ühesandest. Kaik 24 670 eläjad oli lidnas vl 2017. Kaikiš suremb lidnan ristitišt oli 27 500 eläjad vl 1926 i 27..29 tuhad eläjid vll 1989−1998 (29 258 rist. vl 1989).

Rahvahad (2010): venälaižed — 97,3 %, čiganalaižed — 1,1 %, toižed rahvahad — 1,6 %.

Ortodoksižen hristanuskondan nell' pühäpertid oma kaičenus i saudud lidnas: Spasan Toižetamižen päjumalanpert' (1885−1893), koume jumalanpertid, völ üks' jumalanpert' om sauvomas.

Professionaližen opendusen aluzkundad oma Buturlinovkan mehaniž-tehnologine kolledž, medicinine kolledž (ende medtehnikum) i Gubernijan pedagogižen kolledžan filial.

Galerei

• 
  Osered'-jogi
• 
  Spasan Toižetamižen päjumalanpert', vn 2009 nägu
• 
  Gubernijan pedagogižen kolledžan filial vl 2015
• 
  Torguindan keskuz (2015)
• 
  Kodirandantedištandmuzei vl 2015

Irdkosketused

• Lidnankundan tobmuden aluzkundoiden sait (buturlin-gorod.ru). (ven.)
• Lidnan informacine sait (buturlinovka.ru). (ven.)