Orlov (lidn)

Orlov (ven.: Орло́в) om Venäman lidn da lidnankund Kirovan agjan keskuzpalan päivlaskmas. Se om Orlovan rajonan administrativine keskuz.

Orlov
Орлов

Lidnanznam
Valdkund	Venäma
Eläjiden lugu (2018)	6,607 ristitud
Pind	20 km²
Pämez'	Sergei Popul'kin (kül'mku 2018—)
Telefonkod	+7−83 365-xx-xxx
Avtokod	43
Aigvö	UTC+3 (MSK+0)

Istorii

Orlovan lidneihuden aluz oli pandud 12.-13. voz'sadal sirdnikoil Alauz'lidnaspäi, kaivandusiden lähtmižvendon mödhe. Eländpunkt mainitase ezmäižen kerdan nügüdläiženke nimenke vl 1459 Moskvan Vasilii II-ruhtinasen sodavägiden matkanke anastamha Vätkan maid. Nimituz libub personaližes nimespäi vai sijaližes orel' -sanaspäi «terav nem'» (jogiden ühthejoksmusenno). Vl 1600 mainitase kuti Orlovec. Sai makundan lidnan statusad vl 1780. Koume jogavottušt jarmankad oleli lidnas, torguihe nahkoid, pästtihe tal'jankoid i kožalid, tegesid koivun kurčuspäi. Vll 1923−1992 oficialine nimituz oli Halturin sijaližen sündnuden Stepan Halturin-revolücioneran oiktastuseks.

Orlov šingotase šahmatoiden i nardoiden tehmižel, maidtegimel i parziden cilindruindan edheotandal.

Geografijan andmused

Lidn sijadase rajonan suvipäivnouzmaiženno röunanno, Vätk-jogen oiktal randal, 120 m ü.m.t. keskmäižel korktusel. Matkad agjan Kirov-pälidnan röunhasai om 36 km päivnouzmha-pohjoižpäivnouzmha orhal vai 66 km «Vätk»-avtotedme. Toine lähembaine lidn om Kotel'nič (raudtestancijanke) 41 km suvipäivlaskmha orhal vai 48 km «Vätk»-avtotedme.

Orlov om lidnankundan üks'jäine eländpunkt. Lidnankundan pind — 149,02 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 6 959 ristitud, rajonan viž ühesandest. Kaikiš suremb lidnan ristitišt oli enamba 10 tuhad eläjid vll 1970−2001 (10 751 eläjad vl 1979 i 10 600 rist. vl 1996).

Professionaližen opendusen aluzkundad oma Orlovan-Vätkan maižanduzkolledž i Orlovan pedagogikan i proftehnologijoiden kolledž.

Irdkosketused

• Lidnankundan lehtpoled rajonan oficialižel admorlov.ru-saital. (ven.)