Kirs

Kirs (ven.: Кирс) om Venäman lidn Kirovan agjan pohjoižpäivnouzmas. Se om Üläkaman ümbrikon (vll 1965−2020 rajonan) administrativine keskuz da pala.

Kirs
Кирс

Lidnanznam
Valdkund	Venäma
Eläjiden lugu (2021)	8,520 ristitud
Pind	14 km²
Telefonkod	+7−83 339-xx-xxx
Avtokod	43
Aigvö	UTC+3 (MSK+0)

Istorii

Eländpunktan aluz om pandud vl 1729 kuti Kirs-žilo sauvomha da holitamha kaugedraudan tegint, nimitihe jogen mödhe (perm. komi: кырс «pengr», komi: кырас «(jogen)vago»). Sur' uit om saudud vll 1729−1739 varatoitamha tegint vedel. Raudte tuli lidnha vl 1931, Kirs-raudtestancii radab vspäi 1940. Vll 1963−1965 žilo oli Kirsan tegimištoližen rajonan keskuseks, Omutninsk-ki mülüi sihe. Radnikžilo sai lidnan statusad vl 1965.

Kirs šingotase elektrokabelän tegimel, sömtegimištol i mecan ümbriradmižen edheotandal.

Geografijan andmused

Lidn sijadase rajonan suves, Sur' Kirs-jogen (ven.: Большой Кирс, lankteb Vätkan üläjoksmushe oiktalpäi kahtes kilometras päivlaskmha lidnan röunaspäi) i Suren Kirsan uiton-vezivaradimen (4,3 km²) randoil, 160 m ü.m.t. keskmäižel korktusel. Uit ühtenzoitab Vätkad Kaman basseinanke.

Matkad agjan administrativižhe Kirov-keskushesai om 169 km päivlaskmha-suvipäivlaskmha orhal, 192 km avtotedme vai 250 km raudtedme. Lähembaižed lidnad oma Omutninsk 75 km suvhe orhal, 90 km avtotedme vai raudtedme i Vauged Holunic 79 km suvipäivlaskmha orhal vai 114 km avtotedme.

Tobmuz

Kaik nell' žilod i kaks' küläd mülüiba lidnankundha Kirsan ližaks. Lidnankund om tühjitadud vl 2022. Sen pind oli 1 347 km².

Lidnankundan tobmuden pämez' oli sen Administracijan pämez'. Lidnan Dum om likvidiruidud vn 2022 kezakule, likvidacižen laudkundan ezimez' oli Irina Semenovih. Lidnankundan Administracii om likvidiruidud vn 2022 vilukus-tal'vkus, likvidator Jelena Štrauh. Jäl'gmäine Administracijan pämez' oli Eduard Utemov (kül'mku 2017 — kül'mku 2021).

Eläjad

Vn 2010 Venäman rahvahanlugemižen mödhe lidnan eläjiden lugu oli 10 420 ristitud, lidnankundan — 11 388 ristitud, rajonan koumandez. Vn 2021 rahvahanlugemižen mödhe 8 520 ristitud elihe lidnas. Kaik 9 589 ristitud elihe lidnas i 10 355 ristitud kaikes lidnankundas vl 2017. Kaikiš suremb lidnan ristitišt oli 13..14 tuhad eläjid vll 1970−2001 (14 387 eläjad vl 1979).

Ortodoksižen hristanuskondan Jumalanmaman Katken jumalanpert' om saudud vll 1894−1915.

Lapsiden opendusen aluzkundad oma severz'-se päivkodid, üks'jäine keskškol erasiden-se disciplinoiden süvetud opendusenke (om sätud vl 2005 školoiden nomer 1 i 3 ühtištusel), muzikškol. Professionaližen opendusen aluzkund om Vätkan torguindtegimištoline tehnikum (ende profškol nomer 24), baziruiše Kirsas.

Galerei

• 
  Üläkaman rajonan administracijan sauvuz (2018)
• 
  Keskškol i Jumalanmaman Katken jumalanpert', vn 2013 nägu
• 
  «Kirskabel'»-tegimen kontor i A-korpus vl 2011
• 
  Sur' Kirsan uit (2018)
• 
  Kirs-raudtestancii vl 2009

Irdkosketused

• Lidnan i Üläkaman ümbrikon tobmuden sait (admverx.gosuslugi.ru). (ven.)
• Üläkaman istorine muzei vyatkamuseums.ru-saital. (ven.)