Slobodskoi

Slobodskoi (ven.: Слободско́й) om Venäman lidn da lidnümbrik Kirovan agjan keskuzpalas. Se om Kirovan pohjoižpäivnouzmaine ezilidn i mülüb sen aglomeracijha, agjan koumanz'-nellänz' lidn eläjiden lugun mödhe. Om Slobodskoin rajonan administrativižeks keskuseks mugažo, ei mülü rajonha vspäi 1944.

Slobodskoi
Слободской

Lidnanznam	Flag
Valdkund	Venäma
Eläjiden lugu (2018)	32,793 ristitud
Pind	49,6 km²
Pämez'	Irina Želvakova (reduku 2016—)
Telefonkod	+7−83 362-xx-xxx
Avtokod	43
Aigvö	UTC+3 (MSK+0)

Istorii

Varmitadud sauvused oliba lidnan sijas 13. voz'sadaspäi kaivandusiden mödhe. Eländpunkt mainitase ezmäižen kerdan Moskvan Ivan III Sur'-carin kirjeižes, konz hän oigendab Slobodskoi-(ülä)lidnudhe (ven.: Слободской (верхний) городок) Andrei Plemännikov-sodavejad vl 1505, lugetas sidä oficialižen alusenpanendan vodeks. Sai lidnan oficiališt statusad vl 1780. Vll 1913−1921 raudte ühtenzoiti Vätkanke, umbikraudtestancijan nimituz om Slobodskoje, nügüd' se radab vaiše jügujonusiden täht. Vl 2005 mülütihe lidnanvuittušt Pervomaiskii-žilod lidnha mikrorajonaks.

Slobodskoi šingotase mašinansauvomižen tegimel (sötkenandlimed da toine maižanduztehnik), fanerankombinatal, sömtegimištol (lihakombinat, konditerine fabrik, maid- i leibänkombinatad), omblendtegimištol (sobad karvaspäi i tekstiližed), turizmal, mugažo virifabrik radab lidnas.

Geografijan andmused

Lidn sijadase Vätk-jogen oiktal korktal randal, 140 m ü.m.t. keskmäižel korktusel. Matkad agjan Kirov-pälidnan keskushesai om 33 km suvipäivlaskmha orhal, 36 km avtotedme vai 75 km raudtedme. Toižed lähembaižed lidnad oma Vauged Holunic 40 km päivnouzmha-pohjoižpäivnouzmha orhal vai 45 km avtotedme, i Kirovo-Čepeck 22 km suvhe orhal, 46 km avtotedme vai 70 km raudtedme.

Kaks' žilod i kaks' küläd mülüdas lidnümbrikho Slobodskoin ližaks, üks' külä kahtespäi seižub kaikenaigaižeta ristitištota. Lidnümbrikon pind om 49,6 km², sidä kesken territorii Vätkan hural-ki randal.

Eläjad

Vn 2010 Venäman rahvahanlugemižen mödhe lidnan eläjiden lugu oli 33 981 ristitud, lidnümbrikon — 34 460 ristitud. Kaikiš suremb lidnan ristitišt oli läz 39 tuhad eläjid vll 1989−1992 (39 249 ristitud vl 1989). Kaik 33 829 ristitud elihe lidnümbrikos vl 2016.

Rahvahad (2010): venälaižed — 96,0%, udmurtalaižed — 1,7%, totarlaižed — 0,8%, toižed rahvahad — 1,5%.

Professionaližen opendusen aluzkundad oma Slobodskoin tehnologine tehnikum i Slobodskoin pedagogikan i socialižiden kosketusiden kolledž.

Galerei

• 
  Ph. Mikulain jumalanpert', vn 2018 nägu
• 
  Raštvoiden jumalanpert', vn 2019 nägu
• 
  Torguindrived i adivpertintanaz (tagamal) vl 2019
• 
  Kul'turkeskuz Maksim Gor'kijan nimed (2021)
• 
  Avtotesild Vätkas päliči vl 2004

Irdkosketused

• Lidnümbrikon oficialine sait (slobodskoy.ru). (ven.)