Zujevk

Zujevk (ven.: Зу́евка) om Venäman lidn da lidnankund Kirovan agjan päivnouzmas. Se om Zujevkan rajonan administrativine keskuz (vspäi 1929).

Zujevk
Зуевка

Lidnanznam	Flag
Valdkund	Venäma
Eläjiden lugu (2021)	9,767 ristitud
Pind	40,31 km²
Pämez'	Dmitrii Bagräk (uhoku 2023—)
Telefonkod	+7−83 337-xx-xxx
Avtokod	43
Aigvö	UTC+3 (MSK+0)

Istorii

Eländpunktan aluz om pandud vll 1896−1898 kuti žilo stancijanno puruvedimdeponke uden «Perm' — Kotlas»-raudten «Vätk — Glazov»-keskustal, nimitihe lähižen Zui-külän mödhe. Žilo sai lidnan statusad vn 1944 16. päiväl keväz'kud. Vl 2008 oigetihe lidnan 110-vottušt jubilejad. Mülünuded lidnha küläd oliba vanhemb — 300..400 vot.

Zujevk šingotase kahtel mehanižel tegimel, sömtegimištol (maidtegim, leibäntegim, sömkombinat, lindfabrik), raudten edheotandoil (vedimdepo, vagondepo).

Geografijan andmused

Lidn sijadase rajonan keskuzpalan pohjoižes, Čepc-jogen hural randpolel (Vätkan oigedpol'ne bassein), 140 m ü.m.t. keskmäižel korktusel. Minimaline matk Čepchasai om kaks' kilometrad lodeheze lidnan röunaspäi. Sokaz tahond i turbhan löudmižsijad levinedas kudeks..kahesaks kilometraks pohjoižhe, lidnan i Čepcan keskes.

Matkad agjan Kirov-pälidnhasai om 88 km päivlaskmha orhal, 120 km avtotedme vai raudtedme. Lähembaine lidn om Kirovo-Čepeck 66 km päivlaskmha orhal, 80 km avtotedme vai raudtedme.

Tobmuz

Zujevk om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Edeline Administracijan pämez' om Andrei Rodigin (Андрей Родыгин, reduku 2017 — sügüz'ku 2022). Lidnan Duman ezimez' om Oleg Jaroslavcev vn 2022 kül'mkuspäi. Edeližed Duman ezimehed oma Viktor Anikeev (reduku 2017 — kül'mku 2022), Andrei Rodigin (radoi edel vn 2017 redukud).

Eläjad

Vn 2010 Venäman rahvahanlugemižen mödhe lidnan eläjiden lugu oli 11 198 ristitud, rajonan pol', vn 2021 — 9 767 ristitud. Kaik 10 595 eläjad oli lidnas vl 2017. Kaikiš suremb lidnan ristitišt oli 19 903 eläjad vl 1959.

Ortodoksižen hristanuskondan koume pühäpertid oma saudud lidnas: ph. Mikoi-arhangelan jumalanpert' (letihe vll 1996−2005), Spasan Londuseližen Mel'kuvan puine jumalanpert' (saudihe vll 1989−1995 nevondkundaližes pertišpäi), ph. Jurgii-vägestusenkandajan časoun'.

Lapsiden opendusen aluzkundad oma viž nimitadud päivkodid, keskškol, ližaopendusen Lapsiden keskuz, čomamahtoiden škol, sportškol. Zujevkan mehaniž-tehnologine tehnikum om lidnan professionaližen opendusen aluzkundaks.

Galerei

• 
  Vezičuhunduz (2021)
• 
  Enzne škol (2021)
• 
  Keskškol (2021)
• 
  Zujevk-päraudtestancii vl 2021

Irdkosketused

• Lidnankundan lehtpoled rajonan oficialižel zrko.ru-saital. (ven.)