Uržum

Uržum (ven.: Уржу́м, nitmar.: Вӱрзым, Ӱржӱм, Нуж-Ола) om Venäman lidn da lidnankund Kirovan agjan suves. Se om Uržuman rajonan administrativine keskuz.

Uržum
Уржум

Lidnanznam
Valdkund	Venäma
Eläjiden lugu (2021)	8,448 ristitud
Pind	12,68 km²
Pämez'	Sergei Medvedev (reduku 2021—)
Telefonkod	+7−83 363-xx-xxx
Avtokod	43
Aigvö	UTC+3 (MSK+0)

Istorii

Eländpunktan aluz om pandud vl 1584 kuti puine lidnuz kaičemha tahondad marin i tataran feodaloid vaste, nimitihe Uržumk-jogen mödhe. Saudihe ut lidnust vl 1647. Sai makundan lidnan statusad vl 1780.

Uržum šingotase sömtegimištol (etilspirtan da vinan tegim, leibän edheotand, maidtegim om sauvomas). Raudbetontegesiden edheotand projektiruiše.

Geografijan andmused

Lidn sijadase rajonan keskuzpalan lodehes, Uržumk-jogen hural randal (109 km pitte, ven.: Уржу́мка, nitmar.: Вӱрзым эҥер), kümnes kilometras sen lanktendan sijaspäi Vätkha oiktalpäi, 90 m ü.m.t. keskmäižel korktusel. Uržumk om laivjogeks lidnaspäi.

Matkad Marii Elan Tazovaldkundan röunhasai om 25 km suvipäivlaskmha orhal, agjan Kirov-pälidnhasai om 167 km pohjoižhe orhal vai 191 km R169-avtotedme. Lähembaižed lidnad oma Malmiž 77 km suvhe-suvipäivnouzmha orhal vai 91 km avtotedme, Sovetsk 82 km lodeheze orhal vai 99 km avtotedme i Nolinsk 50 km pohjoižhe orhal vai 58 km avtotedme.

Tobmuz

Uržum om lidnankundan üks'jäižeks eländpunktaks.

Lidnankundan tobmuden pämez' om sen Administracijan pämez'. Edeližed Administracijan pämehed oma Andrei Milüzin (reduku 2016 — reduku 2021), Vladimir Darovskih (radoi vn 2016 redukuhusai). Lidnan Duman ezimez' om Dmitrii Mitägin vn 2012 heinkuspäi.

Eläjad

Vn 2010 Venäman rahvahanlugemižen mödhe lidnan eläjiden lugu oli 10 213 ristitud, rajonan kaks' videndest, vn 2021 — 8 448 ristitud. Kaik 9 981 eläjad oli lidnas vl 2017. Kaikiš suremb lidnan ristitišt oli läz 12 tuhad eläjid vll 1979−2001 (12 200 eläjad vll 1998−2000).

Ortodoksižen hristanuskondan kahesa pühäpertid oma kaičenus i saudud lidnas: kafedraline Eläban Eziauguižen Stroican päjumalanpert' (letihe vll 1895−1900, sömsija i kellčuhunduz — vll 1811−1824), nell' jumalanpertid, kaks' časounäd, vanhuskolaižiden loičendpert'.

Lapsiden opendusen aluzkundad oma nell' päivkodid (nomer 1, 2, 3, 5), kaks' keskškolad (nomer 2 i 3), gimnazii, lapsiden ližaopendusen keskuz, čomamahtoiden škol, rajonan sportškol. Professionaližen opendusen aluzkundad oma Uržuman agrariž-tehnine tehnikum i Kirovan medicinižen kolledžan Uržuman filial.

Galerei

• 
  Nevondkundaližen Sergei Kirov-valdkundmehen muzei (2019)
• 
  Eläban Eziauguižen Stroican kafedraline päjumalanpert', vn 2015 nägu
• 
  Istorižed da nügüdläižed laukad vl 2019
• 
  Lidnan gimnazii (2020)
• 
  Znam lidnan röunal (2012, Malmižan polespäi)

Irdkosketused

• Lidnan i sen rajonan tobmuden sait (urzhum43.gosuslugi.ru). (ven.)