Olenegorsk

Olenegorsk (ven.: Оленего́рск, ukr.: Оленєгорськ) om Venäman lidn Murmanskan agjan keskuzpalas. Se om Olenegorskan lidnümbrikon administrativine keskuz, täuz' oficialine nimituz — «Olenegorsk-lidn alištunudenke territorijanke».

Olenegorsk
Оленегорск

Lidnanznam	Flag
Valdkund	Venäma
Eläjiden lugu (2022)	19,533 ristitud
Pind	38,8 km²
Pämez'	Ivan Lebedev (tal'vku 2021—)
Telefonkod	+7−81 552-xx-xxx
Avtokod	51
Aigvö	UTC+3 (MSK+0)

Istorii

Saudihe Olen'ja-raudtestancijad (nüg. Olenegorsk-stancii) vl 1916 kaiken Murmanskan raudten ühtes. Nügüd'aigaižen eländpunktan aluz om pandud vl 1949 Olen'ja-radnikžiloks samha raudkivendod. Se sai lidnan statusad nügüdläiženke nimenke vl 1957.

Olenegorskan ižandusen päsarakod oma kaivuztegimišt (raudkivendon koncentrat i üläkoncentrat, raudasiž-stroncijasine tuhk), sauvondmaterialiden tehmine (silikatine savič, šebin'), standartatoman mašiništon i varapaloiden pästand kaivuzmetallurgižiden edheotandoiden täht, raudasižed valamižtegesed.

Geografijan andmused

Lidn sijadase Permusjärven suvipäivlaskmaižel randal (ven.: Пермусозеро 24 km² pindanke, Vauktan meren bassein), 151 m ü.m.t. keskmäižel korktusel. Kaivuzkombinat sijadase ani lodeheze lidnaspäi, Kahjärven randal (ven.: Кахозеро, 11 km², Barencan meren bassein). Matkad Murmanskhasai om 94 km pohjoižhe orhal, 105 km raudtedme vai «Kol»-avtotedme. Lähembaine lidn om Mončegorsk 35 km suvipäivlaskmha niil-žo teil.

Visokii-sodaeländpunkt («korged», 6860 rist. vl 2010), kaks' pen't raudtestancijad da pen' Imandr-külä mülüdas lidnümbrikho Olenegorskan ližaks. Lidnümbrikon pind om 1889 nellikkilometrad.

Eläjad

Vn 2010 Venäman rahvahanlugemižen mödhe lidnan eläjiden lugu oli 23 072 ristitud, lidnümbrikon — 30 021 ristitud. Kaikiš suremb lidnan ristitišt oli 35 800 eläjid vl 1992. Vl 2017 kaik 21 039 ristitud elihe lidnas i 29 849 ristitud kaikes lidnümbrikos.

Rahvahad (vl 2010, lidnümbrik, enamba 1%, ozutadud rahvahudenke): venälaižed — 89,3%, ukrainalaižed — 5,1%, vaugedvenälaižed — 1,8%, toižed rahvahad — 3,8%.

Ortodoksižen hristanuskondan koume jumalanpertid oma olmas lidnas: kaks' jumalanpertid i časoun'.

Professionaližen opendusen aluzkundad: kaivuztegimišton kolledž, Hibinoiden tehnižen kolledžan filial, Murmanskan, Petroskoin i Moskvan üläopendusen aluzkundoiden koume filialad.

Edeline lidnümbrikon pämez' om Oleg Samarskii (sügüz'ku 2013 — sügüz'ku 2021).

Transport

Kundaline avtobusmaršrut ühtenzoitab lidnad aviabazanke. Aviabaz sijadase Visokii-sodažilos päivnouzmha lidnaspäi, Permusjärven vastrandal.

Ezilidnelektrojonuz ajab Murmanskhasai i Apatitoihesai. Raudte i «Kol»-avtote oma lidnan päivnouzmaižeks röunaks.

Galerei

• 
  Il-76-lendim Olen'j-sodail'mbazas
• 
  Ph. Dmitrii Prilukilaižen jumalanpert' (ortodoksine hristanuskond), vn 2017 nägu
• 
  Komsomol'skii-kar'jer vl 2006
• 
  Stadion (vn 2007 olend)
• 
  Olenegorskan päraudtestancii vl 2017

Irdkosketused

• Lidnümbrikon tobmuden sait (olenegorsk.murman.ru). (ven.)