Kol

Kol (ven.: Кола) om Venäman lidn Murmanskan agjan pohjoižes, Murmanskan suvine ezilidn. Se om Kolan rajonan lidnankund da administrativine keskuz.

Kol
Кола

Lidnanznam	Flag
Valdkund	Venäma
Eläjiden lugu (2017)	9,701 ristitud
Pind	10 km²
Pämez'	Svetlana Čukareva (2014—)
Telefonkod	+7−81 553-xx-xxx
Avtokod	51
Aigvö	UTC+3 (MSK+0)

Istorii

Eländpunktan aluz om pandud vl 1565 kuti meriport da lidnuz. Torguind Evropan maidenke šingotihe aigan mändes, i vl 1780 Kol sai lidnan oiktusid. Lidnan nimi sündui Kol-jogen mödhe. "Kol'jok" znamoičeb "kuldjogi" saameks. Mugažo toine versii starinoičeb, miše "kul'joki" om "kalajogi".

Vl 1854 Kol oli pandud mantazole anglijalaižel "Miranda"-korvetal, oli jänu pal'han ühteks vodeks. Se sai lidnan statusad möst vl 1965.

Geografijan andmused

Lidn seižub Kolan da Tuloman jogiden ühthejoksmusen randoil, 15 m keskmäižel korktusel valdmeren pindan päl. Znamasine mägi om Solovarak. Murmansk sijadase ani lidnan röunan taga, matkad Murmanskan keskushesai om 12 km pohjoižhe avtotedme, Kolan lahten randadme. Harvad manrehkaidused oleldas.

Kol om lidnankundan üks'jäine eländpunkt.

Eläjad

Vn 2010 Venäman rahvahanlugemižen mödhe eläjiden lugu oli 10 437 ristitud, rajonan ristitišton nelländez. Kaikiš suremb ristitišt oli vl 1989 — 16 541 eläjad. Ortodoksižen hristanuskondan kaks' pühäpertid om lidnas.

Ižanduz da transport

Tegimišton päedheotandad oma oludtegim, mebel'fabrik, sauvondkompanijad, raudteholitusen edheotandad. Äjiden eläjiden radinsija sijadase Murmanskas. Agrarižtegimištoline i transportine kolledžad oma professionaližen opendusen aluzkundoikš.

Maršruttaksid da taksid oma kundaližeks transportaks. Avtobusad i ezilidnelektrojonused ühtenzoittas lidnad Murmanskanke da ümbrištonke. «Kol»-avtote om lidnan suviröunaks, avtotesild om sil Tulomas päliči lidnan suvipäivlaskmas. Kolan raudtestancii om jäl'gmäine passažiroiden täht edel Murmanskad, mugažo raudtesarak tuleb Nikel'-Murmanskii-stancijaspäi.

Irdkosketused

• Lidnan tobmuden aluzkundoiden oficialine sait (gov-kola.ru). (ven.)