Zaozörsk

Zaozörsk (ven.: Заозёрск, ukr.: Заозерськ) om Venäman sauptud lidn Murmanskan agjan lodehes.

Zaozörsk
Заозёрск

Lidnanznam	Flag
Valdkund	Venäma
Eläjiden lugu (2023)	7,760 ristitud
Pind	516 km²
Pämez'	Aleksei Pen'šin (keväz'ku 2022—)
Telefonkod	+7−81 556-xx-xxx
Avtokod	51
Aigvö	UTC+3 (MSK+0)

SATÜ:n eländpunktad Pohjoižen laivišton sodameribazoiden kartal

Istorii

Edel 1940. vot saamalaižiden (vspäi 1833) i suomalaižiden žilod (vspäi 1877, suom.: Läntinen Litsa vai Läätsi) oliba lidnan sijas. Nügüd'aigaižen eländpunktan aluz om pandud vl 1958 kuti žilo holitamha vedenalaižiden atomlaividen «Päivlaskmaine Lic»-sodameribazad (ven.: Западная Лица). Vspäi 1962 nimitase Zaozörnii-žiloks. Vozil 1972−1981 nimitihe Severomorsk-7 kirjeižidenvajehtuses. Vl 1981 sodažilo sai lidnan oficiališt statusad nügüdläiženke nimenke erištamha Krasnojarskan randan lidnaspäi, vhesai 1994 mainitihe kuti Murmansk-150 kirjeiženkoril.

Geografijan andmused

Lidn sijadase mägidenkeskeižes, 56 m ü.m.t. keskmäižel korktusel, kahtes kilometras suvhe Barencan meren Motovan lahten Päivlaskmaine Lic-jogen merikaran randaspäi.

Matkad Murmanskaspäi om 54 km lodeheze orhal vai 108 km avtotedme. Lähembaine lidn om Gadžijevo 38 km suvipäivnouzmha orhal vai 56 km avtol.

Tobmuz

Kaik nell' sodažilod mülüdas SATÜ:hu Zaozörskan ližaks: Nerpičj-, Lopatkinan, Pen' Lopatk- i Andrejevan lahtiden žilod.

Municipalitetan pämez' om sen Administracijan pämez', edel vn 2019 sügüz'kud Deputatoiden nevondkundan ezimez' oli lidnankundan pämehen. Igor' Vinokur radab nevondkundan ezimehen vn 2019 sügüz'kuspäi. Lidnan Administracijan pämez' om Aleksei Pen'šin vn 2022 keväz'kuspäi. Edeližed Administracijan pämehed oma Il'jas Mazitov (keväz'ku 2019 — kül'mku 2021), Valerii Urošlev (radoi vn 2019 keväz'kuhusai).

Eläjad

Vn 2010 Venäman rahvahanlugemižen mödhe lidnan eläjiden lugu oli 11 199 ristitud, vn 2021 — 7 762 ristitud. Kaikiš suremb lidnan ristitišt oli 19 300 eläjad vl 1996. Kaik 10 019 eläjad oli lidnas vl 2017.

Rahvahad (enamba 1 % vl 2010, ozutadud rahvahudenke): venälaižed — 81,5 %, ukrainalaižed — 11,3 %, vaugedvenälaižed — 1,9 %, totarlaižed — 1,2 %, toižed rahvahad — 4,1 %.

Ortodoksižen hristanuskondan Mikulai-čudonsädajan puine jumalanpert' om saudud vll 1999−2000.

Lapsiden opendusen aluzkundad oma koume päivkodid, keskškol, lapsiden ližaopendusen keskuz, sportškol. Professionaližen opendusen aluzkundad ratas lähembaižiš lidnoiš. Ende privatižen Murmanskan kooperativižen tehnikuman filial oli lidnas.

Galerei

• 
  Muštnik nevondkundaližile sodamehile (2011)
• 
  VA-laivad Zaozörskas vl 2007
• 
  Keskuzpalan nägu vn 2015 kül'mkus

Irdkosketused

• «Zaozörsk-lidn»-SATÜ:n sijaližen ičeohjastusen aluzkundoiden oficialine sait (zatozaozersk.ru). (ven.)