Mendelejevsk

Mendelejevsk (ven.: Менделе́евск, tot.: Менделеевск / Mendeleyevsk, vai Менделеев шәһәре, vai Миндәлә / Mindälä) om Venäman lidn Tatarstanan Tazovaldkundan pohjoižpäivnouzmas, mülüb Alakaman lidnaglomeracijha. Lidn om Mendelejevskan rajonan administrativine keskuz i üks'jäine lidn, mülüb rajonha lidnankundaks.

Mendelejevsk
Менделеевск (ven.)
Менделеевск / Mendeleyevsk (tot.)

Lidnanznam
Valdkund	Venäma
Eläjiden lugu (2021)	22,875 ristitud
Pind	30,65 km²
Pämez'	Radmir Beläjev (heinku 2023—)
Telefonkod	+7−85 549-xx-xxx
Avtokod	16, 116, 716
Aigvö	UTC+3 (MSK+0)

Istorii

Eländpunktan aluz om pandud vl 1868 kuti Bondüžskii-žilo läz himišt tegint. Vspäi 1928 oli lidnanvuiččeks Bondüžsk-žiloks. Žilo sai lidnan statusad vn 1967 11. päiväl elokud nügüdläiženke nimenke Dmitrii Mendelejev-tedomehen muštoks, hän oli tegimen radnikan. Sil-žo aigal ližatihe eländpunktha lähižid žiloid.

Mendelejevsk šingotase järedal himižel tegimel (himižed i zell'substancijad, sauvondmaterialad), se radab kümnes kilometras lidnaspäi läz ekonomišt Alabug-zonad.

Geografijan andmused

Lidn sijadase Kamanjogen oiktal randal da sen Toim-ližajogen randoil, 100 m ü.m.t. keskmäižel korktusel.

Matkad Kazanihesai om 238 km päivlaskmha. Lähembaižed lidnad oma Jelabug 22 km suvipäivlaskmha orhal vai 28 km avtoteidme i Jarčalli 20 km suvhe orhal vai 37 km avtol.

Tobmuz

Mendelejevsk om lidnankundan üks'jäižeks eländpunktaks.

Lidnankundan tobmuden pämez' om sen Sijaližen ičeohjandusen nevondkundan ezimez'. Edeline lidnan nevondkundan ezimez' om Valerii Čeršincev (semendku 2017 — heinku 2023). Lidnan Radonoigendai komitet om likvidacijan pordhal vn 2015 tal'vkuspäi. Sen likvidacižen laudkundan ohjandai om Almaz Iskakov vn 2024 elokuspäi. Edeline organizacijan ohjandai om Aleksandr Belonogov (uhoku 2016 — eloku 2024).

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 22 075 ristitud, rajonan ristitišton seičeme kümnendest, vn 2021 — 22 875 ristitud. Kaikiš suremb lidnan ristitišt om läz 22 tuhad eläjid vodespäi 2002 (nügüd' i 22 257 rist. vl 2009).

Rahvahad (enamba 1 % vl 2010): totarlaižed — 51,4 %, venälaižed — 39,0 %, udmurtalaižed — 3,1 %, marilaižed — 3,0 %, toižed rahvahad — 3,5 %.

Islaman «Tan»-pühäpert' i «Husain»-mečet' oma avaitud lidnas. Ortodoksižen hristanuskondan viž pühäpertid oma kaičenus i saudud: nell' jumalanpertid i časoun'.

Lapsiden opendusen aluzkundad oma severz'-se päivkodid, koume keskškolad (nomer 1, 2, 4), himiž-tehnologine licei (nomer 3), gimnazii (nomer 1), rajonan čomamahtoiden škol, rajonan Batir-sportškol. Professionaližen opendusen aluzkundad ratas lähembaižiš lidnoiš. Uz' himiž-tehnologine kolledž projektiruiše i linneb vaumitud vn 2024 sügüz'kule.

Galerei

• 
  Lidnan da rajonan tobmuden sauvuz (2010)
• 
  «Tan»-mečet', vn 2007 nägu
• 
  Himine tegim L.Ja. Karpovan nimed vl 2007
• 
  Kul'turkeskuz Sergei Gassar-revolücioneran nimed (2016)
• 
  Vägimehiden allei (2016)

Irdkosketused

• Lidnan da Mendelejevskan rajonan sait (mendeleevsk.tatarstan.ru) Tatarstanan Tazovaldkundan tobmuden portalal. (tot.) (ven.)