Mičurinsk

lidn Venämas


Mičurinsk (ven.: Мичу́ринск) om Venäman lidn, lidnümbrik da raudtesol'm Tambovan agjan päivlaskmas. Se om agjan kahtenz' lidn eläjiden lugun mödhe, om Mičurinskan rajonan administrativižeks keskuseks i ei mülü sihe. Agrarine tedolidn vn 2003 kül'mkuspäi.

Mičurinsk
Мичуринск
 Lidnanznam
 Flag
Valdkund Venäma
Eläjiden lugu (2021) 89,876 ristitud
Pind 78 km²
Mičurinsk Мичуринск
Pämez' Maksim Harnikov
(kül'mku 2018—)
Telefonkod +7−47 545-xx-xxx
Avtokod 68
Aigvö UTC+3 (MSK+0)

Istorii vajehta

Eländpunktan aluz om pandud vl 1635 kuti Kozlov-lidnuz (ven.: Козло́в) lidnan statusanke Mihail Födorovič-carin käskön mödhe sen-žo voden sügüz'kun 5. päiväspäi. Panihe varmitadud lidnust kaičemha Räzanid da toižid lidnoid kalaidajiden heimoiden londoid vaste suvespäi. Šingotihe maižanduzrajonan da torgovanoiden keskuseks 18. voz'sadaspäi. Kozlov sai makundan lidnad oficiališt statusad vl 1779. Lidn eli sures lämoipalos läbi vn 1865 semendkus. Kaks' kaugedraudan tegint, kelloiden tegim, maižanduzprodukcijan ümbriradmine i raudten edheotandad radoiba 19. voz'sadan lopus. Udesnimitihe lidnad nügüdläižikš vn 1932 23. päiväl uhokud kazmusiden selekcijan Ivan Mičurin-tedomehen (1855−1935) kanzannimen mödhe.

Mičurinsk šingotase mašinansauvomižen «Progress»-tegimel[1] (aviakosmine tehnik, kodielektrotehnik, mašiništ gazan i kivivoinveimiden täht), vedimkohenduztegimel, sömtegimištol (jauhkompanii, ploduiden konservtegim) i «Družba»-kivivoiveimiden rajonohjandusel. Sadunkazvatusen kaks' tedoinstitutad ratas lidnas.

Geografijan andmused vajehta

Lidn sijadase rajonan keskuzpalas, Mecvoronež-jogen oiktal randal (ven.: Лесно́й Воро́неж 164 km pitte, Donan hurapol'ne bassein), 150 m ü.m.t. keskmäižel korktusel. Matkad Tambovhasai om 68 km päivnouzmha-suvipäivnouzmha orhal, 74 km «Kaspii»-avtotel vai 70 km raudtel. Toižed lähembaižed lidnad oma Lipeckan agjas, ned oma Gräzi 57 km suvipäivlaskmha orhal, 76 km avtotedme vai 60 km raudtedme, Lipeck 68 km suvipäivlaskmha-päivlaskmha orhal, 92 km avtotedme vai 90 km raudtedme, i Čapligin 52 km lodeheze orhal, 95 km avtotedme vai 79 km raudtedme.

«Kaspii»-avtote (R-22) mäneb seičemes kilometras pohjoižpäivnouzmha lidnaspäi. Nell' raudtestancijad ratas lidnas: Mičurinsk-Ural'skii (päraudtestancii, vspäi 1866), Mičurinsk-Voronežskii (päraudtestancii, vspäi 1886), Kočetovk I-sortiruindstancii da vedimdepo (vspäi 1876), Turmasovo-stancii. Mičurinsk-sodalendimport om ühesas kilometras päivlaskmha-lodeheze lidnan keskusespäi.

Mičurinsk om lidnümbrikon üks'jäižeks eländpunktaks. Lidnümbrikon pind — 78 km².

Eläjad vajehta

Vl 1897 lidnan ristitišt oli 40 297 eläjad, vl 1939 — 71 515 eläjad. Vn 2010 Venäman rahvahanlugemižen mödhe lidnan eläjiden lugu oli 98 758 ristitud. Kaikiš suremb lidnan ristitišt oli enamba 100 tuhad eläjid vll 1975 i 1979−2001 (123 tuh. rist. vl 1997).

Rahvahad (2010): venälaižed — 97,6 %, toižed rahvahad — 2,4 %.

Ortodoksižen hristanuskondan Jumalanmaman Bogolübskai-jumalaižen päjumalanpert' (saudihe vll 1848−1873), viž jumalanpertid i koume časounäd[2] oma olmas lidnas, mugažo Kozlovan Stroican mez'jumalankodi; Kozlovan Bogolübskii-naižjumalankodin sauvused oma kaičenus.

Professionaližen opendusen aluzkundad oma Mičurinskan raudteiden kolledž V.M. Baranovan nimed[3], Mičurinskan tegimištoliž-tehnologine kolledž[4], Mičurinskan valdkundaline agrarine universitet.

Galerei vajehta

Homaičendad vajehta

  1. Mičurinskan «Progress»-tegimen sait (mzp.su). (ven.)
  2. Mičurinskan pühäpertid sobory.ru-saital. (ven.)
  3. Mičurinskan raudteiden kolledžan sait (zdcollege.ru). (ven.)
  4. Mičurinskan tegimištoliž-tehnologižen kolledžan sait (ptk.68edu.ru). (ven.)

Irdkosketused vajehta



Tambovan agjan lidnad
Kirsanov | Kotovsk | Mičurinsk | Moršansk | Rasskazovo | Žerdevk | Tambov | Uvarovo