Jarcevo

Jarcevo (ven.: Я́рцево) om Venäman lidn da lidnankund Smolenskan agjan keskuzpalas. Se om agjan nellänz' lidn eläjiden lugun mödhe, Jarcevon rajonan administrativine keskuz.

Jarcevo
Ярцево

Lidnanznam	Flag
Valdkund	Venäma
Eläjiden lugu (2024)	40,330 ristitud
Pind	32 km²
Pämez'	Nikolai Novosölov (sügüz'ku 2021—)
Telefonkod	+7−48 143-xx-xxx
Avtokod	67
Aigvö	UTC+3 (MSK+0)

Istorii

Eländpunkt mainitaškanzihe Torokaigan vspäi 1610, sen voden kirjeižel Pol'šanman Sigizmund III-kunigaz lahjoiči Jarcovo-žilod Smolenskan Timofei Šušerin-bajarile. Pen' žilo šingotaškanzi tekstil'tegimel vspäi 1873. Jarcevo sai lidnan statusad vl 1926. Toižen mail'man sodan aigan lidn oli okkupiruidud 19. heinku 1941-dathasai, sid' okkupiruidud nacistižen Germanijan sodavägil tošti (5. reduku 1941 — 16. sügüz'ku 1943). Saudihe dizel'likutimiden järedad tegint 1970-nziš vozišpäi.

Jarcevo šingotase bumagkanghiden tegimel i sobiden omblendal, valamižen da vanundan tegimel (likutimiden tegimen sijas), sauvondmaterialiden pästandal (torved plastikizoläcijas, faner, raudbeton, tegesed cinkuidud terasespäi), mašinansauvomižel (avtomašiništ kaivuziden täht, renghad likutimiden täht), kourkrepindan edheotandal, mebel'kombinatal.

Geografijan andmused

Lidn sijadase rajonan suves, Vop'-jogen randoil (ven.: Вопь 158 km pitte, Dnepran üläjoksmusen oiged ližajogi), 190 m ü.m.t. keskmäižel korktusel.

Matkad Smolenskhasai om 51 km suvipäivlaskmha orhal, 60 km avtotel vai raudtel. Toižed lähembaižed lidnad oma Safonovo 35 km päivnouzmha orhal, 39 km avtotedme vai raudtedme, Dorogobuž 42 km suvipäivnouzmha orhal vai 63 km avtotedme, i Duhovščin 23 km lodeheze orhal vai 25 km avtotedme.

«Smolensk — Moskv»-avtote mäneb lidnan pohjoižes i pohjoižröunaks. «Smolensk — Moskv»-raudtekeskust läbitab lidnad. Jarcevo-raudtestancii radab lidnan päivlaskmas vspäi 1870. Toine stancii om Milohovo päivnouzmaižel röunal, se mülüb lidnha vspäi 2006.

Tobmuz

Jarcevo om lidnankundan üks'jäižeks eländpunktaks. Lidnankundan pind — 57,9 km². Vll 2006−2013 lidnan administracii radoi, niiš aigoišpäi rajonan administracii tegeb lidnankundan administracijan velgusidme.

Lidnankundan tobmuden pämez' om sen Nevondkundan ezimez'. Edeline nevondkundan ezimez' om Mihail Frolov (tal'vku 2017 — sügüz'ku 2021). Nevondkund kogoneb 20 deputataspäi, valitas heid videks vodeks.

Eläjad

Vl 1939 lidnan ristitišt oli 36 706 eläjad. Vn 2010 Venäman rahvahanlugemižen mödhe lidnan eläjiden lugu oli 48 800 ristitud, rajonan viž kudendest, vn 2021 — 41 452 ristitud. Kaik 44 740 eläjad oli lidnas vl 2017. Kaikiš suremb lidnan ristitišt oli 57 900 eläjad vl 1996.

Rahvahad (2002): venälaižed — 91,5 %, ukrainalaižed — 1,8 %, armenijalaižed — 1,3 %, vaugedvenälaižed — 1,2 %, toižed rahvahad — 4,2 %.

Rahvahad (enamba 0,4 % vl 2021): venälaižed — 91,3 %, armenijalaižed — 1,0 %, ukrainalaižed — 0,8 %, vaugedvenälaižed — 0,6 %, azerbaidžanlaižed — 0,5 %, toižed rahvahad — 2,5 %, rahvahuden ozutandata — 3,3 %.

Ortodoksižen hristanuskondan üks'toštkümne pühäpertid oma kaičenus i saudud lidnas: kuz' jumalanpertid, kodijumalanpert' rauhidenkodinno, nell' časounäd.

Lapsiden opendusen aluzkundad oma severz'-se päivkodid, üks'jäine aluzškol (nomer 5), kahesa keskškolad (nomer 1, 2, 4, 6..10), gimnazii (ende keskškol nomer 3), lapsiden da norišton sportškol. Jarcevon industrialine tehnikum (ende tekstiline tehnikum) om lidnan professionaližen opendusen aluzkundaks.

Galerei

• 
  Jarcevon rajonan tobmuden sauvuz (2021)
• 
  Phh. Pedroi da Pauloin jumalanpert', nägu vn 2017 6. päiväl vilukud
• 
  Jarcevon tekstil'kombinat vl 2016
• 
  Tekstil'kombinatan radnikoiden kul'turkeskuz (2019)
• 
  Jarcevon fizkul'turine tervehtamižkompleks (2021)

Irdkosketused

• Lidnan da rajonan tobmuden sait (yarcevo.admin-smolensk.ru). (ven.)