Safonovo (lidn)

Safonovo (ven.: Сафо́ново) om Venäman lidn, lidnankund da transporttesol'm Smolenskan agjan keskuzpalas. Se om agjan videnz' lidn eläjiden lugun mödhe, Safonovon rajonan administrativine keskuz.

Safonovo
Сафоново

Lidnanznam
Valdkund	Venäma
Eläjiden lugu (2024)	37,055 ristitud
Pind	29,58 km²
Pämez'	Svetlana Šapovalova (sügüz'ku 2016—)
Telefonkod	+7−48 142-xx-xxx
Avtokod	67
Aigvö	UTC+3 (MSK+0)

Istorii

Eländpunktan aluz om pandud vl 1859 kuti Dorogobuž-raudtestancii da žilo senno udel «Moskv — Smolensk»-raudtel, radaškanzi vl 1870. Nimitihe stancijad lähembaižen lidnan mödhe. Kätihe žilod Safonovon rajonan keskuseks vl 1929, hot' volostin enzne Safonovo-külä sijazihe kümnes kilometras stancijaspäi. Nimituz libub hristanuskondan kalendarin Sofonii-nimespäi. Žilo stancijanno sai radnikžilon statusad vn 1938 7. päiväl redukud, nimitihe nügüdläižikš, raudtestancijad-ki. Šingotihe vll 1948−1960 kuti buran hilen samižen keskuz. Safonovo om lidnan statusanke vn 1952 sulakun 8. päiväspäi.

Safonovo šingotase plastikmaterialiden da plastmasstegesiden kudel edheotandal, mašinansauvomižel (elektrolikutimiden da generatoriden tegim, ühthekeitandapparatad, katilmašiništ), sauvondmaterialiden pästandal (raudbetontegesed, savič, asfal't, mecanümbriradmižen tegim, mobiližed pertid), sömtegimištol (lihan i leibän edheotandad).

Geografijan andmused

Safonovon rajonan sijaduz agjas vn 2012 kartal

Lidn sijadase rajonan suves, Vopec-jogen randoil (ven.: Вопе́ц 74 km pitte, Dnepran üläjoksmusen oiged ližajogi), 213 m ü.m.t. keskmäižel korktusel.

Matkad Smolenskhasai om kahesakümne koume kilometrad päivlaskmha-suvipäivlaskmha orhal, 97 km avtotel vai raudtel. Toižed lähembaižed lidnad oma Jarcevo 35 km päivlaskmha orhal, 39 km avtotedme vai raudtedme, i Dorogobuž 22 km suvhe orhal vai 24 km avtotedme. «Smolensk — Moskv»-avtote mäneb lidnan pohjoižes i pohjoižröunaks. «Smolensk — Moskv»-raudtekeskust läbitab lidnad.

Tobmuz

Safonovo om lidnankundan üks'jäižeks eländpunktaks. Lidnankundan pind — 29,58 nellikkilometrad.

Lidnankundan pämez' om sen nevondkundan ezimez'.

Eläjad

Vl 1939 lidnan ristitišt oli 3 589 eläjad. Vn 2010 Venäman rahvahanlugemižen mödhe lidnan eläjiden lugu oli 43 500 ristitud, rajonan koume nelländest, vn 2021 — 38 403 ristitud. Kaik 42 707 eläjad oli lidnas vl 2017. Kaikiš suremb lidnan ristitišt oli 53..56 tuhad eläjid vll 1976−1998 (56 571 rist. vl 1989).

Rahvahad (2002): venälaižed — 94,0 %, vaugedvenälaižed — 1,3 %, ukrainalaižed — 1,1 %, toižed rahvahad — 3,6 %.

Rahvahad (enamba 0,4 % vl 2021): venälaižed — 80,9 %, čiganalaižed — 0,5 %, toižed rahvahad — 2,5 %, rahvahuden ozutandata — 16,1 %.

Ortodoksižen hristanuskondan viž jumalanpertid oma kaičenus i saudud lidnas. Protestantizman koume pühäpertid oma avaitud.

Lapsiden opendusen aluzkundad oma vižtoštkümne nimitadud i nomeruidud päivkodid (nomer 1, 4, 5, 7, 10..13, 15, 16, 18, 20..23), augškol-päivkodi, kahesa keskškolad (nomer 1..4, 6..9), gimnazii, kaks' čomamahtoiden školad, čomamahtoine škol, sportškol. Safonovon industrialiž-tehnologine tehnikum, privatine Turizman, menedžmentan da informacižtehnologijoiden tehnikum (om reorganizacijan pordhal vn 2024 kül'mkuspäi) i valdkundaližen Smolenskan profopendusen akademijan Safonovon filial oma lidnan professionaližen opendusen aluzkundoikš.

Galerei

• 
  Raštvoiden jumalanpert', vn 2015 nägu
• 
  «Avangard»-tedotehmižkompleksan ofis (2011, plastik i kompozitmaterialad)
• 
  Lidnan kul'turkeskuz (2005)
• 
  Lidnan avtobusstancii vl 2008 vai sen aigemba
• 
  Safonovo-päraudtestancijan sauvuz vl 2015

Irdkosketused

• Lidnan Nevondkundan sait (safonovogorsovet.admin-safonovo.ru). (ven.)
• Lidnan da rajonan Administracijan sait (safonovo-admin.ru). (ven.)