Duhovščin

Duhovščin (ven.: Духовщи́на) om Venäman lidn da lidnankund Smolenskan agjan keskuzpalan lodehes. Se om Duhovščinan rajonan administrativine keskuz, rajonan kahtenz' eländpunkt eläjiden lugun mödhe lidnanvuiččen Ozörnii-žilon jäl'ghe.

Duhovščin
Духовщина

Lidnanznam
Valdkund	Venäma
Eläjiden lugu (2018)	4,103 ristitud
Pind	10 km²
Pämez'	Väčeslav Terent'jev (sügüz'ku 2014—)
Telefonkod	+7−48 166-xx-xxx
Avtokod	67
Aigvö	UTC+3 (MSK+0)

Istorii

Ende Pühän Hengen naižjumalankodi (ortodoksine hristanuskond) oli olmas lidnan territorijal 13.-14. voz'sadal. Eländpunkt mainitaškanzihe vspäi 1675. Duhovščin-žilo sai makundan lidnan statusad vn 1777 uhokun 18. päivän käskön mödhe, sirtihe makundan keskust Kaspl'-lidnaspäi (nüg. Kaspl'-2-žilo Smolenskan rajonas). Vn 1812 soda mureni lidnad znamasižešti. Toižen mail'man sodan aigan lidn oli okkupiruidud (15. heinku 1941 — 19. sügüz'ku 1943).

Duhovščin šingotase leibänkombinatal, mecan varhapanendal da sen pilindal. Nevondkundaližen aigan pöl'vhantegim radoi.

Geografijan andmused

Lidn sijadase rajonan suvipäivnouzmas, Vostic-jogen randal (ven.: Востица, Dnepran üläjoksmusen oigedpol'ne bassein), 220 m ü.m.t. keskmäižel korktusel. Matkad Smolenskhasai om 49 km suvhe-suvipäivlaskmha orhal vai 57 km avtotel. Toižed lähembaižed lidnad oma Demidov 57 km päivlaskmha orhal vai 115 km avtotedme, i Jarcevo 23 km suvipäivnouzmha orhal vai 25 km avtotedme. «Smolensk — Nelidovo»-avtote läbitab lidnan keskuzpalad i ümbärdab päivnouzmaspäi.

Pölvhantegimen žilo (ven.: посёлок Льнозавод, 63 rist. vl 2018) mülüb lidnankundha Duhovščinan ližaks. Lidnankundan pind — 10,94 km².

Eläjad

Vl 1939 lidnan ristitišt oli 3 864 eläjad. Vl 2012 lidnan eläjiden lugu oli 4 225 ristitud, lidnankundan — 4 307 ristitud, rajonan kaks' seičemendest. Kaikiš suremb lidnan ristitišt oli 6 600 eläjad vl 1913 i enamba 5,5 tuhad eläjid vll 1989−1998 (5 800 rist. vll 1992−1996). Kaik 4 166 ristitud elihe lidnankundas vl 2018.

Ortodoksižen hristanuskondan Pühän Hengen tulendan pühäpert' (1811−1819) om olmas lidnas.

Rahvahad (2010): venälaižed — 96,7 %, toižed rahvahad — 3,3 %.

Professionaližen opendusen aluzkundad ratas Jarcevos. Duhovščinan agrotehnine tehnikum kändihe Jarcevon industrialižen tehnikuman filialaks vn 2015 redukus.

Irdkosketused

• Lidnankundan oficialine sait (gorduh.admin-smolensk.ru). (ven.)
• Lidnan da rajonan Administracijan sait (duhov.admin-smolensk.ru). (ven.)