Daugavpils

Daugavpils (mugažo latvijan kelel; latg.: Daugpiļs; edel 1920. vot Dvinsk, edel 1893. vot Dünaburg, vozil 1656−1667 Borisoglebsk) om lidn Latvijan suvipäivnouzmas. Se om tazovaldkundan alištusenke, Latvijan kahtenz' lidn ristitišton lugun mödhe da järed raudtesol'm.

Daugavpils

Lidnanznam	Flag
Valdkund	Latvii
Eläjiden lugu (2024)	77,799 ristitud
Pind	72,48 km²
Pämez'	Andreis Elksnin'š (viluku 2019—, Andrejs Elksniņš)
Telefonkod	+371−54
Aigvö	tal'vel UTC+2, kezal UTC+3

Lidnan transportteiden kart (2012)

Istorii

Livin Ordenan mameister Ernst von Ratzeburg pani Daugavpilsan (Dünaburgan) alusen vl 1275 kuti ricarin zamk. Dünaburgan zamk oli 19 km ülezjogen, nügüd' Vecpils. Vl 1577 Ivan Grazijan sodaväged murenziba zamkad Livonižen sodan aigan, i carin käskön mödhe šancsauvusiden aluz om pandud nügüdläižen lidnan sijha.

Vll 1655−1656 lidn oli Ročinman palaks; vll 1656−1666 da 1772−1920 — Venäman palaks; vll 1666−1772 mülüi Reč Pospolitaiha; vozil 1920−1944 oli ripmatomas Latvijas; 1944−1991 — Nevondkundaližen Ühtištusen palaks.

Zamk oli olmas vhesai 1810, sid' seinid heittihe savičuid ottes. Vozil 1810−1878 sauvoihe Daugavpilsan lidnusen Daugavan molembil randoil. Se om kaikiš suremb sodalidnuz Baltijan maiš.

Geografijan andmused

Lidnan sijaduz valdkundas vn 2021 kartal

Lidn sijadase Daugav-jogen (Päivlaskmaine Dvin) randoil, 105 m ü.m.t. keskmäižel korktusel.

Matkad Righasai om 218 km raudtedme, 232 km avtotedme, Vil'nüshasai om 174 km suvipäivlaskmha. Valdkundröunad oma läz: Litvanmanke 25 km suvipäivlaskmha, Vaugedvenämanke 33 km suvipäivnouzmha.

Klimat om ven, kontinentaližemb mi mererandal. Voden keskmäine lämuz om +6,6 C°, kezakun-elokun +15,8..+18,1 C°, tal'vkun-uhokun −2,2..−4,1 C°. Ekstremumad oma −43,2 C° (viluku, uhoku) i +35,1 C° (heinku). Paneb sadegid 635 mm vodes, enamba kezakus-elokus (72..74 mm kus), vähemba vilukus-sulakus (35..40 mm kus).

Tobmuz

Lidnan territorialižed rajonad (2012)

Daugavpils jagase 25 lidnrajonaks territorialižešti.

Eläjad

Vl 1910 lidnan ristitišt oli 110 tuhad eläjid. Vl 2000 kaik 115 265 eläjad oli registriruidud lidnas. Kaik 83 908 eläjad oli lidnas vl 2017. Kaikiš suremb lidnan ristitišt oli 129 tuhad eläjid vl 1989.

Lidnan rahvahad kahten rahvahanlugemižen mödhe:

rahvahuz	rist. (1989)	%	rist. (2011)	%
kaik	124910	100,00 %	93312	100,00 %
venälaižed	72775	58,26 %	50013	53,60 %
latvijalaižed	16243	13,00 %	18447	19,77 %
sida kesken latgalalaižed			7673	8,22 %
pol'šanmalaižed	16338	13,08 %	13278	14,23 %
vaugedvenälaižed	11385	9,11 %	6674	7,15 %
ukrainalaižed	3903	3,12 %	1795	1,92 %
litvalaižed	1118	0,90 %	891	0,95 %
čiganalaižed	353	0,28 %	375	0,40 %
evrejalaižed	1373	1,10 %	311	0,33 %
toižed	1422	1,14 %	1528	1,64 %

Sport

• BFC Daugavpils

Transport

Avtobusad, tramvaid da taksid oma kundaližeks transportaks lidnas. Raudte tuli lidnha vl 1860. Se ühtenzoitab lidnad Riganke da Minskanke.

Daugavpilsan lendimport (DGP) sijadase kaks'toštkümnes kilometras pohjoižpäivnouzmha lidnan keskuzpalaspäi, seižub kävutamatoman, lendahtamižsargan apakod oma heittud. Vhesai 1993 se oli nevondkundaližiden sodavägiden lendimport, 1990-nziden voziden lopus lendelihe Righa da Kopenhagenha.

Irdkosketused

• Lidnan oficialine sait (daugavpils.lv). (latv.)