Väznikad

Väznikad (ven.: Вя́зники) om Venäman lidn Vladimiran agjan pohjoižpäivnouzmas. Se om Väznikan rajonan da lidnankundan administrativine keskuz.

Väznikad
Вязники

Lidnanznam
Valdkund	Venäma
Eläjiden lugu (2021)	36,203 ristitud
Pind	37 km²
Pämez'	Sergei Pobotkin (reduku 2021—)
Telefonkod	+7−49 233-xx-xxx
Avtokod	33
Aigvö	UTC+3 (MSK+0)

Istorii

Eländpunktan aluz om pandud vl 1608 külähä läz amuišt Jaropolč-Zalesskii-lidnad. Külä sai lidnan statusad vl 1778. Vspäi 2005 enzne lidnanvuitte Novoväznikad-žilo mülüb lidnha sen laptaks. Nimituz libub jalaimiden (ven.: вяз) mecaspäi.

Väznikad šingotasoiš avtoiden da traktoriden fariden, pidatezarmaturan i toižiden paloiden tehmižel, pölvazkanghiden i brezentan pästandal, sömtegimištol (leibtegesed, maidprodukcii, mineralvezi, konservad, «Maggi»-keitozkubuded), mugažo koume omblendfabrikad da plastikprofil'ne tegim oma saudud lidnas.

Geografijan andmused

Lidn sijadase rajonan keskuzpalan pohjoižpäivnouzmas, läz Kläz'm-jogen oiktad randad (Volgan oigedpol'ne bassein), 130 m ü.m.t. keskmäižel korktusel. Matkad Vladimirhasai om 93 km päivlaskmha avtotedme. Lähembaine järed lidn om Kovrov lodeheze, matkad om 45 km orhal vai 60 km avtotedme.

Ühtennimine Väznikad-raudtestancii radab «Vladimir — Alauz'lidn»-keskustal.

Tobmuz

Kaik 62 eländpunktad mülüdas lidnankundha (municipaline ühtnik) Väznikan ližaks: nell' žilod, 57 küläd da üks' tarh. Lidnankundan pind om 801,86 km².

Lidnankundan pämez' om Rahvahaližiden deputatoiden nevondkundan ezimez'. Edeline lidnan pämez' om Galina Starodubova (reduku 2016 — reduku 2021). Lidnan erigoittud Administracii om likvidiruidud vn 2016 tal'vkus, rajonan Administracii tegeb sen velgusidme.

Eläjad

Vn 2010 Venäman rahvahanlugemižen mödhe lidnan eläjiden lugu oli 41 248 ristitud, lidnankundan — 46 959 ristitud. Kaikiš suremb lidnan ristitišt oli 45..46 tuhad eläjid vozil 1979−1992. Vl 2017 kaik 36 635 ristitud elihe lidnas i 41 655 ristitud kaikes lidnankundas.

Ortodoksižen hristanuskondan kümne pühäpertid oma kaičenus i saudud lidnas, niiden kesken Blagoveščenjan naižjumalankodi (oli mehiden täht vll 1641−1916) i Jumalanmaman Tulendan Pühäpertihe mez'jumalankodi: kaks' päjumalanpertid, kuz' jumalanpertid i kaks' časounäd.

Väznikan tehniž-ekonomine kolledž om lidnan professionaližen opendusen aluzkundaks.

Galerei

• 
  Lämoipalonvastaine palakund Päjumalanpertin torgul (2019)
• 
  Blagoveščenjan päjumalanpert' ühtennimižes naižjumalankodiš, vn 2019 nägu
• 
  Istorižed torguindrived vl 2019
• 
  Lidnan nägu Kläz'm-jogelpäi (2012)
• 
  Väznikad-päraudtestancii vl 2019

Irdkosketused

• Lidnan i Väznikan rajonan tobmuden sait (adm-vyaz.ru). (ven.)
• Lidnan informacine portal (вязники.рф). (ven.)
• Lidnan i rajonan turizman sait (вязники.народы33.рф). (ven.)