Radužnii (Vladimiran agj)

Radužnii (ven.: Ра́дужный) om Venäman lidn Vladimiran agjan keskuses. Se om sauptud administrativiž-territorialine ühtnik (vspäi 1998), Vladimiran suvine ezilidn, lidn agjan alištusenke.

Radužnii
Радужный

Lidnanznam	Flag
Valdkund	Venäma
Eläjiden lugu (2021)	18,470 ristitud
Pind	113,2 km²
Pämez'	Andrei Kolgaškin (reduku 2020—)
Telefonkod	+7−49 254-xx-xxx
Avtokod	33
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Istorii

Eländpunktan aluz om pandud vl 1971 kuti kaičendministrusen tegimišton žilo «Raduga»-konstruktorbüron radnikoiden täht sodunus tahos. Vl 1977 se sai radnikžilon statusad Vladimir-30-nimenke. Vspäi 1991 žilo tegihe lidnaks nügüdläiženke nimenke.

Radužnijan ižandusen päsarak om ladimensauvomine, mugažo sömtegimišton edheotandad (lihaprodukcii) da mebel'ceh oma olmas. «Raduga»-lazersodapoligon sijadase lidnan suvipäivlaskmpoles.

Geografijan andmused

Lidn sijadase Kläz'man oiktal randpolel (Volgan oigedpol'ne bassein) vides kilometras jogespäi, seižub 160 m ü.m.t. keskmäižel korktusel. Radužnijan pindan ühesa kümnendest om kattud mecoil. Matkad Vladimiran röunhasai om läz 10 km pohjoižhe orhal, läz 20 km suvipäivnouzmha avtotedme.

Radužnii om SATÜ:n üks'jäine eländpunkt.

Eläjad

Vn 2010 Venäman rahvahanlugemižen mödhe eläjiden lugu oli 18 211 ristitud. Ristitišton lugu om kaikenaigaine, vspäi 1996 17..18 tuhad elädas lidnas. Kaikiš suremb ristitišt oli vl 2017 (18 535 eläjad) i vll 2000−2001 (18 500 eläjad).

Ortodoksižen hristanuskondan koume pühäpertid oma avaitud lidnas: Jumalanmaman Kazanin jumalaižen naižjumalankodi (vspäi 2005, Jelisavetan i Varvaran jumalanpertinke), Venäman uziden moknikoiden da hengenavaidamižen kundlijoiden puine pühäpert' i heiden-žo časoun'.

Vladimiran tehnologine kolledž om specialižen keskopendusen aluzkundaks.

Edeline Nevondkundan ezimez' om Andrei Kolgaškin (reduku 2015 — kezaku 2020), hän radab lidnan nügüdläižen pämehen. Siti-menedžer oli Sergei Naiduhov vn 2015 kül'mkuspäi, edel sidä hän radoi lidnan Administracijan pämehen vspäi 1995.

Galerei

• 
  Mec lidnas (2006)
• 
  Koumanz' fartal laukanke vl 2007
• 
  Personaližed linmad (2013)

Irdkosketused

• Lidnan tobmuden aluzkundoiden oficialine sait (raduzhnyi-city.ru). (ven.)