Usinsk

Usinsk (ven.: Уси́нск, komi: Ускар) om Venäman lidn Komin Tazovaldkundan pohjoižes. Om Usinskan lidnümbrikon administrativižeks keskuseks.

Usinsk
Усинск (ven.)
Ускар (komi)

Lidnanznam
Valdkund	Venäma
Eläjiden lugu (2020)	37,155 ristitud
Pämez'	Nikolai Takaev (2015—)
Telefonkod	+7−82 144-xx-xxx
Avtokod	11, 111
Aigvö	UTC+3 (MSK+0)

Istorii

Eländpunktan aluz om pandud vl 1966 samha kivivoid, om nimitadud jogen mödhe. Vl 1984 žilo sai lidnan statusad.

Usinskan ižandusen päsarakod oma londuseližen gazan da kivivoin samine, transportiruind i ümbriradmine. Kaikiš pohjoižemb kivivoinümbriradai tegim sijadase 60 km pohjoižhe lidnaspäi (1,3 mln tonnoid vodes). Läz 27 tuhad radsijid om ümbrikon edheotandoiš.

Geografijan andmused

Lidn sijadase nelläs kilometras Usanjogen oiktal randalpäi, 71 m ü.m.t. keskmäižel korktusel. Läbipäzmatomad sod ümbärtas lidnad. Matkad Siktivkarhasai om 757 km suvipäivlaskmha. Om tal'veližid avtoteid Uht-lidnhasai da Arhangel'skan agjaha (Nencan avtonomine ümbrik).

Klimat om subarktine, lumikate venub 230 päiväd vodes (redukun keskespäi kezakuhusai). Voden keskmäine lämuz om −3,4 C°, kezakun..elokun +10..+15 C°, semendkun +2 C°, sügüz'kun +6 C°, tal'vkun..uhokun −16..−20 C°. Paneb sadegid 517 mm vodes, enamba kaiked heinkus-sügüz'kus (59..67 mm kus), vähemba uhokus-sulakus (25..28 mm kus).

Lidnanvuitte Parm-žilo (1214 rist. vl 2017), 18 muite žilod da küläd mülüdas ümbrikho Usinsk-lidnan ližaks. Ümbrik om olmas vspäi 2006, sen pind — 30 564 km².

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 40 827 ristitud, lidnümbrikon ristitišt oli 47 229 eläjad (44 525 rist. vl 2017). Kaikiš suremb lidnan ristitišt oli 49 600 eläjad vl 1998. Vl 2017 lidnan ristitišt oli 38 800 eläjad.

Rahvahad kaikenaigaižes ristitištos (lidnümbrik, enamba 0,9 % vl 2010): venälaižed — 55,9 %, komilaižed — 13,9 %, ukrainalaižed — 7,1 %, totarlaižed — 6,7 %, baškiralaižed — 2,3 %, azerbaidžanlaižed — 1,4 %, vaugedvenälaižed — 1,4 %, čuvašalaižed — 0,9 %, toižed rahvahad — 4,3 %, rahvahuden ozutandata — 6,1 %.

Ortodoksižen hristanuskondan kaks' jumalanpertid oma saudud lidnas.

Politehnine tehnikum om lidnan professionaližen opendusen aluzkundaks.

Lidnümbrikon pämez' om sen Administracijan pämez'. Lidnümbrikon Nevondkundan ezimez' om Mihail Serov vn 2020 redukuspäi.

Transport

Avtobusad oma kundaližeks transportaks lidnas da sen ümbrištos. Usinsk-raudtestancii om sarakon lopstancijaks Sin'-raudtestancijaspäi. Jogitransport vedab matknikoid-ki Us- da Pečor-jogidme.

Tatanmaine civiline Usinsk-lendimport (УСН / USK / UUYS) sijadase kahesas kilometras päivlaskmha lidnaspäi. Tehtas reisid Arhangel'skha, Moskvha i Piterihe, vahtradnikoiden täht tobjimalaz.

Galerei

• 
  Muštnik Tatanman kaičijoile Pripolärnai- i Kivivoinsajiden irdoiden risttel, vn 2019 nägu
• 
  Milicijan motocikl muštnikaks Gosavtoinspekcijan sauvusenno (2019)
• 
  Avtobusstancii vl 2019
• 
  Usinsk-lendimportan sauvuz vl 2019

Irdkosketused

• Lidnümbrikon oficialine sait (администрация-усинск.рф). (ven.)