Sosnogorsk

Sosnogorsk (ven.: Сосного́рск, komi: Сӧснагорт) om Venäman lidn, lidnankund da raudtesol'm Komin Tazovaldkundan keskuzpalas. Se om Sosnogorskan rajonan administrativižen keskusen (om olmas vspäi 1979), om rajonan palaks.

Sosnogorsk
Сосногорск (ven.)
Сӧснагорт (komi)

Lidnanznam	Flag
Valdkund	Venäma
Eläjiden lugu (2020)	26,004 ristitud
Pind	24,9 km²
Pämez'	Andrei Zverev (reduku 2021—)
Telefonkod	+7−82 149-xx-xxx
Avtokod	11, 111
Aigvö	UTC+3 (MSK+0)

Istorii

Eländpunktan aluz om pandud vl 1939 kuti Ižm-raudtestancii sauvomha «Kotlas — Vorkut»-raudted. Vn 1955 1. tal'vkud ühtištadihe žilod lähiženke Sosnovk-žilonke (panihe vl 1945 Pohjoižen gazanümbriradmižen keskuseks) da anttihe lidnan statusad. Vl 1957 udesnimitihe sidä nügüdläižikš.

Sosnogorskan ižandusen znamasižed edheotandad oma ÜRV «Gazprompererabotka» (londuseližen gazan ümbriradmine), Sosnogorskan LEK, punümbriradai «Voivož-Les», Pohjoižen raudten Sosnogorskan regionan administracii.

Geografijan andmused

Lidn seižub Ižm-jogen hural randal (Pečoran bassein). Matkad Siktivkarhasai om 345 km suvipäivlaskmha, Uhtahasai — 15 kilometrad lodeheze.

Klimat om ven, kuz'ne mec ümbärdab lidnad. Voden keskmäine lämuz om –1,5 C°, kezakun i elokun +11,5..+11,9 C°, heinkun +15,6 C°, tal'vkun-uhokun –13,9..–15,7 C°. Paneb sadegid 751 mm vodes.

Tobmuz

Kaik 13 žilod da küläd mülüdas lidnankundha lidnale ližaks, niiden ühthine ristitišt om 5 309 eläjad (2017. voz').

Lidnankundan tobmuden pämez' om sen Nevondkundan ezimez'. Edeline Nevondkundan ezimez' om Junir Bičkurin (Юнир Бичкурин, semendku 2015 — reduku 2021). Lidnankundan erigoittud Administracii om likvidiruidud vn 2013 redukus.

Eläjad

Vn 2010 Venäman rahvahanlugemižen mödhe lidnan eläjiden lugu oli 27 757 ristitud. Kaik 26 571 ristitud elihe lidnas vl 2017. Kaikiš suremb lidnan ristitišt oli läz 31 tuhad eläjid vozil 1992–2001.

Ortodoksižen hristanuskondan pühäpertiden kompleks om saudud: koume jumalanpertid i časoun'.

Sosnogorskan tehnologine tehnikum om lidnan professionaližen opendusen aluzkundaks.

Kaik 12 päivkodid, viž keskškolad, gimnazii, kadetškol, lapsiden sädamižen pert', čomamahtoiden škol i sportškol, koume sportkompleksad da üks' jäpert'kulu oma avaitud lidnas.

Galerei

• 
  Puruvedim-muštnik vl 2019 (serii Er 787-27)
• 
  Pühäpertiden kompleks, vn 2011 nägu
• 
  Tulend «Jugid Lun»-puištho (2019)
• 
  «Kimii mecoi»-skul'ptur (2015)
• 
  Sosnogorsk-raudtestancijan sauvuz vl 2011

Irdkosketused

• Lidnan nevondkundan lehtpoled Sosnogorskan rajonan oficialižel sosnogorsk.org-saital. (ven.)
• Sosnogorsk-lidnankundan lehtpoled socialižes Vkontakte-verkos (vk.com). (ven.)