Mikun' (komi: Микунь, ven.: Ми́кунь) om Venäman lidn Komin Tazovaldkundan suvipäivlaskmas. Mülüb Ust'-Vimin rajonha lidnankundaks, üks'jäine lidn rajonas.

Mikun'
Микунь
Valdkund Venäma
Eläjiden lugu (2020) 9,558 ristitud
Pind 13,91 km²
Mikun' Микунь
Pämez' Nikolai Kudräšov
(2016—)
Telefonkod +7−82 134-xx-xxx
Avtokod 11, 111
Aigvö UTC+3

Istorii vajehta

Eländpunkt augotihe vl 1937 Pohjoižen raudten panendan aigan, sen istorijan muzei om lidnas. Vl 1940 sauvoihe elektrostancijad sihe. Žilo raudtestancijanno sündui vodel 1945, radnikžilo vn 1947 redukuspäi.

Žilo kändihe lidnaks vl 1959. Sauvoihe raudted Siktivkarha suvipäivnouzmha da Udoran maha lodeheze, i 1960-nzil vozil lidn tegihe järedaks raudtesol'meks.

Kaik kaks' raudtestancijad om lidnas: Mikun' päraudtel i Mikun'-kahtenz' Udoran sarakol. Om kompressorstancijoid läz lidnad pompamha kivivoid i londuselišt gazad magistraližil veimil.

Geografijan andmused vajehta

Lidn sijadase Vičegd-jogen da sen Vim'-ližajogen oiktal randpolel (Pohjoižen Dvinan oigedpol'ne bassein). Rajonan Aikino-keskuz sijadase 15 km suvhe avtotedme, Vičegdan randal. Matkad Siktivkaraspäi om 108 km avtotedme vai 96 km raudtedme lodeheze. Lähembaine lidn om Jemv 50 km pohjoižpäivnouzmha raudtedme vai 100 km avtotedme.

Šežam-žilo (1 rist. vl 2014) mülüb lidnankundha Mikunin ližaks.

Eläjad vajehta

Vn 2010 rahvahanlugemižen mödhe lidnan eläjiden lugu oli 10 088 ristitud. Kaikiš suremb ristitišt oli läz 12 tuhad eläjid vozil 1989−2001. Kaik 9 837 eläjad oli lidnas vl 2017.

Ortodoksižen hristanuskondan kaks' pujumalanpertid[1] oma saudud da avaitud lidnas: Jumalanmaman Počajevan jumalaižen (om pühästadud vl 1996) i Pühän Jumalanmaman Emäganpäivän (letihe vll 1994−1996).

Siktivkaran avtomehanižen tehnikuman Mikunin filial[2] om lidnan professionaližen opendusen aluzkundaks, edel 2023. vot se oli Mikunin raudtetehnikumaks.

Galerei vajehta

Homaičendad vajehta

  1. Mikunin pühäpertid sobory.ru-saital. (ven.)
  2. Mikunin filial Siktivkaran avtomehanižen tehnikuman autotechkomi.ru-saital. (ven.)

Irdkosketused vajehta



Komin Tazovaldkundan lidnad
Int | Jemv | Mikun' | Pečor | Siktivkar | Sosnogorsk | Uht | Usinsk | Vorkut | Vuktil