Tihvinan rajon

Tihvinan rajon (ven.: Тихвинский район) om municipaline ühtnik Leningradan agjas.

Tihvinan rajon
Тихвинский район

Znam	Flag
Valdkund	Venäma
Administrativine keskuz	Tihvin
Eläjiden lugu (2016)	70,024 ristitud
Pind	7,018,00 km²

Administrativine keskuz om Tihvin-lidn. Siš eläb rajonan ristitišton viž kudendest. Edel 2006 vot lidn ei mülünd rajonha, se alištui agjan tobmudele.

Istorii

Rajonan aluz om pandud vl 1927 elokun 1. päiväl Leningradan agjan Leningradan ümbrikho ühten aigan niiden sädandanke. Vl 1930 heinkun 23. päiväl heitihe ümbrikod, i siš aigaspäi rajon mülüb Leningradan agjaha kuti administrativine ühtnik. Vozil 1945−2006 Tihvin-lidn alištui agjan tobmudele. Vl 1952 Boksitogorskan rajon erištui rajonaspäi. Tihvinan rajon om olmas nügüdläižiš röunoiš vspäi 2006.

Geografijan andmused

Tihvinan rajon om Leningradan agjan päivnouzmaine taho. Pind — 7 018 nellikkilometrad (nellänz' sija agjas). Mec otab viž kudendest rajonan territorijad, sidä kesken enamba pol't om kavag'mecad.

Om röunoid Venäman seičemenke rajonanke i ümbrikonke:

• pohjoižpäivnouzmas Leningradan agjan Kos'kenaluižen rajonanke;
• päivnouzmas Vologdan agjan Babajevon ümbrikonke;
• suvipäivnouzmas Leningradan agjan Boksitogorskan rajonanke;
• suvipäivlaskmas Uz'lidnan agjan Lübitinon rajonanke da Leningradan agjan Kirišin rajonanke;
• lodehes Leningradan agjan Volhovan rajonanke;
• pohjoižes Leningradan agjan Pöudon rajonanke.

Znamasižed joged oma Paš (Süvärin hura ližajogi) da Säs' (lankteb Ladogha), ned mülüdas Atlantižen valdmeren basseinha. Kaik om 146 pen't järved 112 km² ühthiženke pindanke.

Londuseližed varad oma turbaz, sauvondmaterialad (letked, saved), mec, reskvezi. Londuseližen Vepsän mec-puišton pala om rajonan pohjoižpäivnouzmas.

Vn 2006 vilukun 1. päiväspäi rajonan territorii jagase ühesaks municipaližeks ühtnikaks: üks' lidnankund da kahesa küläkundad.

Tobmuz

Käskusenandai tobmuz om Ezitajiden Nevondkund (ven.: Совет депутатов) 18 ühtnijanke, heišpäi vaiše kaks' voidas rata kaikenaigaižešti. Kaik rahvaz valičeb heid videks vodeks. Järgvaličendad sihe oliba vn 2014 sügüz'kun 14. päiväl. Aleksandr Lazarevič radab sen ezimehen da rajonan pämehen vn 2012 sügüz'kun 26. päiväspäi kahtenden strokun jäl'geten. Ezitajiden Nevondkund valičeb rajonan administracijan pämest. Tihvinan rajonan varapämez, Tihvin-lidnankundan pämehen varapämez i kaks' nevojad oma hänele abhu.

Vn 2016 keväz'kun 26. päiväspäi Vera Pastuhova om valitud i radab rajonan administracijan pämehen. Rajonan administracijan koume varapämest oma hänele abhu. Seičeme komitetad da laudkund alištudas rajonan administracijale.

Vspäi 2014 Kundaline Nevondkund (ven.: Общественный Совет) radab rajonas. Siš ei voi olda 40 ühtnijad enamba.

Eläjad

Vn 2002 Venäman rahvahanlugemižen mödhe rajonan eläjiden lugu oli 14 637 ristitud (Tihvinanke — 77 975 rist.), vl 2010 — 70 988 ristitud.

Kaik om 198 eländpunktad rajonas, sidä kesken üks' lidn, kümne žilod, koume raudtestancijan žilod, 182 küläd da kaks' sijašt.

Toižed sured eländpunktad oma Šugar'v-žilo (2,4 tuh. rist. vl 2012) da Bor-külä (1,2 tuh. rist. vl 2010).

Rahvahad (enamba 0,4 % vn 2010 Venäman rahvahanlugemižen mödhe): venälaižed — 82,6 %, ukrainalaižed — 1,0 %, vaugedvenälaižed — 0,7 %, toižed rahvahad — 1,9 %, rahvahuden ozutandata — 13,8 %.

Erased igähižed rahvahad: vepsläižed — 0,19 % (133 rist.), karjalaižed — 0,08 % (56 rist.).

Vepsläižed elädas rajonan pohjoižpäivnouzmas i administrativižes keskuses (Tihvinas).

Ižanduz

Rajonan ižandusen päsarakod oma transportmašinoidensauvomine (vagonoiden tehmine), gazanveimtransport, mecan varhapanend da ümbriradmine, maižanduz.

Irdkosketused

• Tihvinan rajonan oficialine sait (tikhvin.org). (ven.)