Pöudon rajon

Pöudon rajon (ven.: Лодейнопольский район) om rajon Leningradan agjas.

Pöudon rajon
Лодейнопольский район

Znam	Flag
Valdkund	Venäma
Administrativine keskuz	Pöud (lidn)
Eläjiden lugu (2016)	29,664 ristitud
Pind	4,910,95 km²

Administrativine keskuz om Pöud-lidn, sijadase rajonan pohjoižpalas. Rajonan ristitišton kaks' koumandest eläb siš.

Istorii

Rajonan aluz om pandud vl 1927 elokun 1. päiväl Leningradan agjan Pöudon ümbrikho ühten aigan niiden sädandanke. Vl 1930 heinkun 23. päiväl heitihe ümbrikod, i siš aigaspäi rajon mülüb Leningradan agjaha kuti administrativine ühtnik. Vl 1955 rajonad ühtištuihe Ojatin rajonanke. Rajon om olmas nügüdläižiš röunoiš vspäi 2006.

Geografijan andmused

Pöudon rajon om Leningradan agjan pohjoižpäivnouzmaine taho. Pind — 4 910 nellikkilometrad (seičemenz' sija agjas). Kavag'mecad oma enambuses.

Om röunoid 4 Venäman rajonanke:

• pohjoižpäivnouzmas Leningradan agjan Kos'kenaluižen rajonanke;
• suves Leningradan agjan Tihvinan rajonanke;
• suvipäivlaskmas Leningradan agjan Volhovan rajonanke;
• pohjoižes Karjalan Tazovaldkundan Oloncan rahvahaližen rajonanke.

Om Ladoganjärven randan pala päivlaskmas. Znamasižed joged oma Süvär' sen Ojat'- da Paš- huriden ližajogidenke. Joged mülüdas Nevan (Atlantižen valdmeren) basseinha.

Londuseližed varad oma turbaz, sauvondmaterialad (letked, saved), mec, reskvezi.

Vspäi 2006 rajonan territorii alajagase 5 municipaližhe ühtnikha: 2 lidnkundha da 3 küläkundha.

Tobmuz

Käskusenandai tobmuz om Ezitajiden Nevondkund (ven. Совет депутатов) 15 ühtnijanke. Kaik rahvaz valičeb heid videks vodeks. Järgvaličendad sihe oliba vl 2014 sügüz'kun 14. päiväl. Vladimir Radkevič radab sen ezimehen da rajonan pämehen vs 2006 vilukun 1. päiväspäi koumanden strokun jäl'geten. Ezitajiden Nevondkund valičeb rajonan administracijan pämest.

Vspäi 2007 Il'ja Dmitrenko om valitud i radab rajonan administracijan pämehen, se om hänen koumanz' strok jäl'geten. Ezmäine varapämez' da koume muite varapämest oma hänele abhu. Seičeme palakundad, komitet da laudkund alištudas rajonan administracijale.

Eläjad

Vn 2010 Venäman rahvahanlugemižen mödhe eläjiden lugu oli 30 469 ristitud (jäl'gmäine sija agjas).

Kaik om 123 eländpunktad rajonas, sidä kesken 1 lidn, 1 lidnanvuitte Svir'stroi-žilo, 6 žilod, 4 raudtestancijan žilod, 111 küläd.

Toižed sured eländpunktad oma Alöhovščin-külä (1,6 tuh. rist. vl 2015) da Janeg-žilo (1,0 tuh. rist. vl 2014).

Rahvahad (vn 2010 Venäman rahvahanlugemižen mödhe, enamba 0,8%): venälaižed — 84,1%, ukrainalaižed — 1,4%, vaugedvenälaižed — 0,9%, toižed rahvahad — 2,4%, rahvahuden ozutandata — 11,2%.

Erased igähižed rahvahad: karjalaižed — 0,44% (134 rist.), vepsläižed — 0,11% (35 rist.).

Ižanduz

Rajonan ižandusen päsarakod oma mecan varhapanend da ümbriradmine, sauvond da sömtegimišt, gidroenergetik (Alasüvärin GES).

Irdkosketused

• Pöudon rajonan oficialine sait. (ven.)