Teikovo

Teikovo (ven.: Те́йково) om Venäman lidn da lidnümbrik Ivanovon agjan päivlaskmas. Se om agjan kudenz' lidn eläjiden lugun mödhe, Teikovon rajonan administrativine keskuz (ei mülü sihe).

Teikovo
Тейково

Lidnanznam	Flag
Valdkund	Venäma
Eläjiden lugu (2021)	31,623 ristitud
Pind	26,8 km²
Pämez'	Svetlana Semenova (kül'mku 2019—)
Telefonkod	+7−49 343-xx-xxx
Avtokod	37
Aigvö	UTC+3 (MSK+0)

Istorii

Eländpunkt mainitaškanzihe kuti Teikovo-žilo (ven.: село Тейково) manmehiden vasthalibundoiden tagut 17. voz'sadan augotišes. Ezmäižen kangazfabrikan aluz oli pandud Teikovoho vl 1787. Žilo sai lidnan statusad vn 1918 6. päiväl sügüz'kud. Raketsodavägiden 54. divizii baziruiše sodalidnudes vspäi 1961.

Teikovo šingotase bumagkanghiden kombinatal, omblendtegimištol, sauvondmaterialiden pästandal (fanerankombinat, sendvičpaneliden tehmine, geokanghan edheotand), mugažo mašinansauvomižen tegim radab (aviapalad, poltuzpompad) i kombisötken tegim om olmas.

Geografijan andmused

Lidn sijadase Väz'm-jogen randoil (ven.: Вязьма 86 km pitte, Kläz'man hurapol'ne bassein), 125 m ü.m.t. keskmäižel korktusel.

Matkad Ivanovon röunhasai om 25 km pohjoižpäivnouzmha orhal, 29 km avtotel vai raudtel. Toižed lähembaižed lidnad oma Kohm 35 km päivnouzmha-pohjoižpäivnouzmha orhal, 45 km avtotedme vai raudtedme, i Komsomol'sk 22 km pohjoižhe-lodeheze orhal vai 31 km avtotedme. Teikovo-raudtestancii radab lidnan päivnouzmaižel röunal vspäi 1896.

Tobmuz

Teikovo om lidnümbrikon üks'jäižeks eländpunktaks.

Eläjad

Vl 1939 lidnan ristitišt oli 30 294 eläjad. Vn 2010 Venäman rahvahanlugemižen mödhe lidnan eläjiden lugu oli 34 976 ristitud. Kaikiš suremb ristitišt oli 41 607 rist. vl 1970 i 38..39 tuhad eläjid vozil 1989−2001.

Rahvahad (2010): venälaižed — 94,3 %, ukrainalaižed — 1,9 %, toižed rahvahad — 3,8 %.

Ortodoksižen hristanuskondan kuz' pühäpertid oma kaičenus i saudud lidnas: ph. Mikulai-čudonsädajan päjumalanpert' (1795−1833), koume jumalanpertid i kaks' časounäd.

Lapsiden opendusen aluzkundad oma severz'-se päivkodid, nell' keskškolad (nomer 1, 2, 4, 10), gimnazii nomer 3. Teikovon industrialine kolledž i Teikovon äiprofil'ne kolledž oma lidnan professionaližen opendusen aluzkundoikš.

Galerei

• 
  Kul'turkeskuz Leninan nimed ühtennimižel torgul (2010)
• 
  Ph. Mikulai-čudonsädajan päjumalanpert' (huralpäi) i ph. Illä-endustajan jumalanpert', vn 2018 nägu
• 
  Teikovon bumagkanghiden kombinat vl 2018
• 
  Kombisötken tegim vl 2010
• 
  Teikovo-päraudtestancii vl 2007

Irdkosketused

• Lidnümbrikon Administracijan i Duman sait (городтейково.рф). (ven.) (angl.) (saks.) (fr.) (ital.)
• Teikovo-lidnan istorijan muzejan sait (музей-тейково.рф). (ven.)