Zavolžsk

Zavolžsk (ven.: Заво́лжск) om Venäman lidn da lidnankund Ivanovon agjan pohjoižpäivnouzmas, Kinešman ezilidn. Se om Zavolžskan rajonan administrativine keskuz (vspäi 1968).

Zavolžsk
Заволжск

Lidnanznam	Flag
Valdkund	Venäma
Eläjiden lugu (2017)	10,384 ristitud
Pind	8 km²
Pämez'	Andrei Ivanov (sügüz'ku 2017—. velgusentäutai)
Telefonkod	+7−49 333-xx-xxx
Avtokod	37
Aigvö	UTC+3 (MSK+0)

Istorii

Ezmaine eländpunkt oli tetab lidnan territorijal kuti Vladičnoje (Bogojavlenskoje)-žilo 17. voz'sadaspäi. Sätihe Zavolžje-radnikžilod 16 eländpunktan ühtištusel vn 1934 20. päiväl uhokud. Radnikžilo sai lidnan statusad nügüdläiženke nimitusenke vn 1954 20. päiväl redukud, lidnan päiv oigendase semendkun jäl'gmäižel sobatal. Vll 1955−1957 Gor'kijan vezivaradim om täuttud.

Zavolžsk šingotase himižel tegimel (mujutimed, ližadused, rikin puhtastandan katalizator), čulkfabrikal, fibrmatkliphiden, pölvhanümbriradmižen i betonan edheotandoil, sömtegimištol.

Geografijan andmused

Lidn sijadase rajonan keskuzpalan suves, pidust' Volgan Gor'kijan vezivaradimen hurad randad, 130 m ü.m.t. keskmäižel korktusel. Vezivaradimen tazopind om 84 m ü.m.t., 1..2 kilometrhasai levette lidnad vaste. Matkad Kostroman agjhasai om 12 km pohjoižhe orhal, Ivanovohosai om 89 km suvipäivlaskmha orhal, 114 km avtotel vai 300 km raudtel. Lähembaižed lidnad oma Kinešm Volgan vastrandal 1 km suvipäivlaskmha orhal vai 2 km avtotedme, i Navoloki 11 km päivlaskmha orhal, 15 km avtotedme vai ülezjogen.

Zavolžsk-raudtestancii radab 50-kilometrižen sarakon lopus «Kostrom — Galič»-keskustaspäi, se om vaiše jüguiden täht. Kinešman avtotesild ühtenzoitab Volgan randoid vspäi 2003.

Tobmuz

Zavolžsk om lidnankundan üks'jäine eländpunkt. Lidnankundan pind — 9,85 km².

Edeline lidnan pämez' om Marina Varegina (2010−2015), hän radab lidnan Nevondkundan ezimehen vspäi 2010.

Eläjad

Vl 1939 eländpunktan ristitišt oli 12 117 eläjad. Vn 2010 Venäman rahvahanlugemižen mödhe lidnan eläjiden lugu oli 12 045 ristitud, rajonan kaks' koumandest. Kaikiš suremb ristitišt oli 16..17 tuhad eläjid vozil 1970−1992 (17 226 rist. vl 1979).

Rahvahad (2010): venälaižed — 97,3%, totarlaižed — 1,1%, toižed rahvahad — 1,6%.

Professionaližen opendusen aluzkund om Kinešman politehnižen kolledžan filial.

Galerei

• 

  Lidnan ohjastusen pert' (2010)

• 

  Sündun nägusen ortodoksine jumalanpert' (2010)

• 

  Zavolžskan himine tegim (2010)

• 

  Läžundkodid

• 

  Kul'turkeskuz (oiktalpäi) i kodirandantedištandmuzei (huralpäi) vl 2010

Irdkosketused

• Lidnankundan oficialine sait (zavgoradm37.ru). (ven.)