Novoaleksandrovsk

Novoaleksandrovsk (ven.: Новоалекса́ндровск) om Venäman lidn Stavropolin randan lodehes. Se om Novoaleksandrovskan lidnümbrikon (edel vn 2017 semendkud — rajonan) administrativine keskuz.

Novoaleksandrovsk
Новоалександровск

Lidnanznam	Flag
Valdkund	Venäma
Eläjiden lugu (2023)	26,410 ristitud
Pind	21,0 km²
Telefonkod	+7−86 544-xx-xxx
Avtokod	26, 126
Aigvö	UTC+3 (MSK+0)

Istorii

Eländpunktan aluz om pandud vl 1804 kuti Novoaleksandrovskai-stanic (ven.: станица Новоалександровская) kozakištol i sirdnikoil Venäman keskuzgubernijoišpäi elänzoitmaha tahondad, miše varmitada valdkundan suviröunad i teid Mustmerennoks. Stanic sai lidnan statusad vl 1971 nügüdläiženke nimenke. Vll 2004−2017 lidn oli rajonan erigoittud lidnankundaks ičeze tobmudenke.

Novoaleksandrovskan ižandusen päsarak om sömtegimišt (lihakombinat, villänpurnud, jauhon tehmine), mugažo kombisötken tegim, stökolmülütimiden tegim, omblendfabrik (sobad lapsiden täht) i betontegesiden pästandan edheotand ratas lidnas.

Geografijan andmused

Lidn sijadase Rasševatk-jogen randoil (ven.: Расшеватка 74 km pitte, Jegorlikan i Manič-jogen hurapol'ne bassein), 131 metrad ü.m.t. keskmäižel korktusel. Novoaleksandrovsk seižub kesked maižanduzrajonad, toižetujan nepstoindan zonas, paneb 450..550 mm sadegid vodes keskmäras. Matkad Stavropolihesai om 77 km suvipäivnouzmha orhal.

Rasševatk-raudtestancii radab vspäi 1897, sijadase «Kropotkin — Stavropol'»-jonol.

Eläjad

Vn 2010 Venäman rahvahanlugemižen mödhe lidnan eläjiden lugu oli 26 757 ristitud, ümbrikon ristitišton kaks' videndest. Vl 2018 lidnan ristitišt oli 26 997 eläjad. Kaikiš suremb lidnan ristitišt oli 29 tuhad eläjid vozil 1996−2000.

Rahvahad (enamba 1 % vl 2010): venälaižed — 89,5 %, armenijalaižed — 3,6 %, čiganalaižed — 3,3 %, toižed rahvahad — 3,2 %, rahvahuden ozutandata — 0,4 %.

Ortodoksižen hristanuskondan kaks' pühäpertid oma avaitud lidnas: Mikoi-arhangelan jumalanpert' i ph. Ioann Vostorgov-moknikan časoun'.

Lidnan opendusen aluzkundad oma 11 päivkodid, gimnazii, licei, koume keskškolad, muzikškol, čomamahtoine škol i sportškol lapsiden täht. Privatižen Stavropolin kooperativižen tehnikuman filial om lidnan professionaližen opendusen aluzkundaks.

Galerei

• 
  Lidnan Administracijan sauvuz (2012)
• 
  Bankan filial, vn 2012 nägu
• 
  Bobuštuzkompleks lapsiden täht vl 2012
• 
  Ümbrikacundan kezr (2012)
• 
  Znam lidnan röunal vl 2011

Irdkosketused

• Novoaleksandrovskan lidnümbrikon tobmuden sait (newalexandrovsk.gosuslugi.ru) i sen vanh versii (newalexandrovsk.ru, edel vn 2023 redukud). (ven.)