Ipatovo

Ipatovo (ven.: Ипа́тово) om Venäman lidn Stavropolin randan pohjoižes. Om Ipatovon lidnümbrikon administrativine keskuz (edel 2017. vot ümbrik oli Ipatovon rajonaks).

Ipatovo
Ипатово

Lidnanznam	Flag
Valdkund	Venäma
Eläjiden lugu (2022)	22,440 ristitud
Pind	16 km²
Telefonkod	+7−86 542-xx-xxx
Avtokod	26, 126
Aigvö	UTC+3 (MSK+0)

Ipatovo-päraudtestancijan sauvuz vl 2005

Istorii

Eländpunktan aluz om pandud vl 1860, i vhesai 1880 nimitihe sidä Čemrek-külä (ven.: Чемрек) mahapandud läheli nogaižen ruhtinasen mödhe. Sid' vhesai 1935 nimi oli Vinodel'noje (ven.: Винодельное) vinan varažomiden äjüden taguiči. Udesnimitadud Venäman Rahvahanikoiden sodan Pötr Ipatov-ühtnijan kanzannimen mödhe, hän pölištui külän ümbrištos vl 1918. Vspäi 1979 Ipatovo om lidnan statusanke.

Ipatovo om maižanduzrajonan keskuz, om sömtegimišton (saguden edheotand, oludentegim, elevator) i sauvondan edheotandoid, kombisötken tegim radab, savičun tegim om sauvomas. Londuseližen gazan löudmižsijad oma läz lidnad. «Kolos»-motobolklub om Venäman lidirujiden koumen kesken.

Geografijan andmused

Lidn sijadase Kalaus-jogen (Manič-jogen ližajogi) hural randal 100 m kortte valdmeren pindan päl, jogi om päivnouzmaižeks röunaks. Čemrek-oja läbitab kaiked lidnad da lankteb Kalausha. Matkad Stavropolihesai om 125 km suvipäivlaskmha avtotedme. Lähembaine lidn om Svetlograd 50 km suvhe kaikil teil. Federaline «Astrahan' — Stavropol'»-avtote (R-216) om lidnan pohjoižröunaks. Avtobusstancii da Ipatovo-raudtestancii (om avaitud vl 1914 kut Vinodel'noje) ratas lidnas.

Klimat om terav kontinentaline, kuivan polhe. Ekstremumad oma −35 C° i +45 C°. Paneb sadegid 300..400 mm vodes.

Eläjad

Vn 2010 Venäman rahvahanlugemižen mödhe eläjiden lugu oli 26 053 ristitud, rajonan kaks' videndest. Vl 2018 lidnan ristitišt oli 24 021 eläjad. Kaikiš suremb lidnan ristitišt oli läz 28 tuhad eläjid vozil 1996−2009 (28 800 rist. vl 1998).

Rahvahad (enamba 1% vl 2010): venälaižed — 95,5%, toižed rahvahad — 4,0% ravhahuden ozutandata — 0,5%.

Ortodoksižen hristanuskondan kaks' jumalanpertid oma avaitud lidnas: Sündun Voznesenjan (om saudud vll 2000−2013) i Feodosii Černigovalaižen.

Ipatovon äiprofil'ne tehnikum om lidnan profopendusen aluzkundaks.

Irdkosketused

• Ipatovon lidnümbrikon tobmuden sait (ipatovo.org). (ven.)