Ust'-Ilimsk

Ust'-Ilimsk (ven.: Усть-Или́мск) om Venäman lidn da lidnümbrik Irkutskan agjan lodehes. Se om agjan nellänz' lidn eläjiden lugun mödhe, om Ust'-Ilimskan rajonan administrativižeks keskuseks mugažo, ei mülü sihe.

Ust'-Ilimsk
Усть-Илимск

Lidnanznam	Flag
Valdkund	Venäma
Eläjiden lugu (2021)	79,570 ristitud
Pind	229 km²
Pämez'	Anna Ščokina (sulaku 2019—)
Telefonkod	+7−39 535-xx-xxx
Avtokod	38, 85, 138
Aigvö	UTC+8 (MSK+5)

Lidnan kart tramvaiverkonke (2017)

Istorii

Eländpunktan aluz om pandud vl 1966 kuti Ust'-Ilim sauvomha padoseinäd da gidroelektrostancijad Angar-jogel, mecümbriradajan kompleksan edheotandoid. Eziauguižin planiruihe panda padoseinäd Iliman jogensunno, sid' valitihe sijad 30 kilometras mödvedhe, no nimi jäi enzne. Žilo sai lidnan statusad vl 1973 nügüdläiženke nimenke, vspäi 1974 alištub agjan tobmudele oikti.

Ust'-Ilimsk šingotase järedal GES:al (sadametraine padosein) i lämuzenergetikal, mecan ümbriradmižel pilindmaterialoihe, cellülozbumagaižel tehmižel, kivihilen samižel, mugažo leibtegim radab.

Geografijan andmused

Lidn sijadase Angar-jogen i Ust'-Ilimskan vezivaradimen randoil, 207..320 m korktusil, 300 m ü.m.t. keskmäižel korktusel.

Matkad Irkutskhasai om 650 km suvhe orhal, 890 km avtotedme vai 1280 km raudtedme. Ust'-Ilimsk-raudtestancii sijadase rajonan Železnodorožnii-žilos ani suvhe lidnaspäi, vaiše jüguraudted oma saudud lidnas, ühtenzoittas Železnogorskanke Ilimal. Lähembaižed lidnad oma Železnogorsk Ilimal 175 km suvipäivnouzmha orhal, 473 km avtotedme vai 240 km raudtedme, Bratsk 210 km suvhe orhal vai 280 km avtol i Kodinsk (Krasnojarskan rand) 220 km päivlaskmha-lodeheze orhal vai 440 km avtotedme.

Klimat om terav kontinentaline kuivahk vilunke tal'venke. Voden keskmäine lämuz om −3,0 C°, kezakun-elokun +14,0..+17,6 C°, tal'vkun-uhokun −21,5..−24,3 C°. Ekstremumad oma −53,9 C° i +41,0 C°. Paneb sadegid 360 mm vodes.

Tobmuz

Ust'-Ilimsk om lidnümbrikon üks'jäižeks eländpunktaks.

Lidnümbrikon tobmuden pämez' om sen Administracijan pämez' (mer). Edeline lidnan pämez' om Vakil' Tulubaev (2008−2010, sügüz'ku 2015 — sulaku 2019). Lidnan Dum kogoneb 20 deputataspäi, sen ezimez' om Arsenii Čihir'kov vn 2019 redukuspäi. Edeližed Duman ezimehed oma Sergei Zacepin (reduku 2018 — reduku 2019), Vitalii Peretolčin (radoi vn 2018 redukuhusai).

Eläjad

Vn 2010 Venäman rahvahanlugemižen mödhe lidnan eläjiden lugu oli 86 610 ristitud, vn 2021 — 79 570 ristitud. Kaik 82 455 eläjad oli lidnas vl 2017. Kaikiš suremb lidnan ristitišt oli 114 tuh. eläjid vl 1992.

Ortodoksižen hristanuskondan koume pühäpertid oma avaitud lidnas: kaks' jumalanpertid i časoun'.

Professionaližen opendusen aluzkundad: Ust'-Ilimskan mectegimištoližiden tehnologijoiden tehnikum, saraktehnologijoiden tehnikum, Baikalan valdkundaližen universitetan (Irkutsk) filial, Irkutskan energetižen kolledžan filial.

Transport

Avtobusad, kiruhtramvaid da taksid oma kundaližeks transportaks.

Regionaline civiline lendimport (UIK / УТК) sijadase 17 km lodeheze lidnan keskusespäi. Tehtas reisid Irkutskhasai.

Galerei

• 
  Jumalanmaman «Pölištunuziden aznoičend»-jumalaižen časoun', vn 2007 nägu
• 
  Ust'-Ilimskan gidroelektrostancijan padosein vl 2020
• 
  Baikalan valdkundaližen universitetan (Irkutsk) filial vl 2009 (vll 2002−2015 üläopendusen aluzkundan nimituz oli Baikalan ekonomikan da oiktusen valdkundaline universitet)
• 
  Tramvain jono vl 2020
• 
  Ust'-Ilimsk-lendimportan perron vl 2000 vai 2001

Irdkosketused

• Lidnan Duman oficialine sait (duma38.ru). (ven.)
• Lidnan Administracijan oficialine sait (ust-ilimsk.ru). (ven.)