Angarsk

Angarsk (ven.: Ангарск) om Venäman lidn da lidnümbrik Irkutskan agjan suves. Se om agjan kahtenz' surtte lidnümbrik i koumanz' surtte lidn, Irkutskan lodehline ezilidn.

Angarsk
Ангарск

Lidnanznam	Flag
Valdkund	Venäma
Eläjiden lugu (2017)	226,374 ristitud
Pind	294 km²
Pämez'	Sergei Petrov (sulaku 2015—)
Telefonkod	+7−3955-xxx-xxx
Avtokod	38, 85, 138
Aigvö	UTC+8 (MSK+5)

Istorii

Eländpunktan aluz om pandud Transsibal Maisk-radnikžiloks vl 1946 pästmaha nozolad poltust kivivoišpäi saksan reparacijan mašiništol. Angarsk sai lidnan statusad vn 1951 30. päiväl semendkud, nimitihe jogen mödhe. Šingotihe himižen sarakon keskuseks, vn 1959 rahvahanlugemine fiksirui 134 390 eläjad. Vll 1993−1997 Angarskan rajon oli olmas. Sädihe lidnümbrikod vl 2015 lidnaspäi enččenke rajonanke.

Geografijan andmused

Lidn sijadase Angar- i Kitoi-jogiden keskes i niiden ühthejoksmusenno. Angar jokseb päivnouzmaižeks röunaks (ven.: Ангара, hura rand), Kitoi om päivlaskmaižeks röunaks (ven.: Китой, jogen oiged rand), 425 m ü.m.t. keskmäižel korktusel. Voib nähta Päivnouzmaižen Sajanan Kitoin Gol'cad-mägisel'gad poudal päiväl. Matkad Irkutskan röunhasai om 10 km suvipäivnouzmha orhal. Toižed lähembaižed lidnad oma Šelehov 25 km suvhe orhal i Sibirin Usol'je 20 km lodeheze orhal.

Lidnanvuitte Meget-žilo (8 918 rist. vl 2014, tel Irkutskannoks), 7 žilod, 3 küläd da 2 zajimkad mülüdas lidnümbrikho Angarskan ližaks. Lidnümbrikon pind — 1 150 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 233 567 ristitud. Kaikiš suremb lidnan ristitišt oli enamba 260 tuhad eläjid vll 1987−2001 (269 000 eläjid vll 1991−1993). Vl 2017 kaik 238 508 ristitud elihe lidnümbrikos.

Ortodoksižen hristanuskondan ph. Stroican päjumalanpert' (om saudud vll 1995−2006), Jumalanmaman pühän Emäganpäivän jumalanpert' i časoun', protestantizman jumalanpertid i islaman «Al' Furkan»-pühäpert' oma olmas lidnas.

Ižanduz

Angarsk šingotase kivivoihimižen i himižen sarakon tegimil (poltuz, voi, voižimed, heretused, bazižed substancijad), elektrolizan kombinatal (uranan küllästamine, katalizatorad), sauvondmaterialiden edheotandoil (cement, gazbeton, torved, metalližkonstrukcijad) i sömtegimištol.

Avtobusad, tramvaid, ezilidnelektrojonused (viž stancijad) da taksid oma kundaližeks transportaks lidnas. Lähembaine lendimport sijadase Irkutskas.

Galerei

• 
  Muštnik oigetud katargha politižile türmatud mehile (2019)
• 
  Ph. Stroican päjumalanpert', vn 2012 nägu
• 
  Angarskan valdkundaline tehnine universitet (2011, ende akademii)
• 
  «Neftehimik»-kul'turkeskuz (2019, Kivivoihimik)
• 
  «Jermak»-sportkeskusen Sur' Aren (2012)
• 
  Praznuičend Angarskas (2001). Lidnan počtamt om tagamal huralpäi
• 
  Angarsk-päraudtestancijan sauvuz vl 2011

Irdkosketused

• Lidnan Duman oficialine sait (duma-angarsk.ru). (ven.)
• Lidnan Administracijan oficialine sait (angarsk-adm.ru). (ven.)