Sajansk

Sajansk (ven.: Саянск) om Venäman lidn da lidnümbrik Irkutskan agjan suves. Om ümbärtud Ziman rajonal.

Sajansk
Саянск

Lidnanznam	Flag
Valdkund	Venäma
Eläjiden lugu (2017)	38,897 ristitud
Pind	82,5 km²
Pämez'	Oleg Borovskii (sügüz'ku 2014—)
Telefonkod	+7−39 553-xx-xxx
Avtokod	38, 85, 138
Aigvö	UTC+8 (MSK+5)

Istorii

Eländpunktan aluz om pandud vn 1970 22. päiväl sulakud kuti Uz' Zim-žilo (ven.: Новая Зима) sauvomha elektrohimižkombinatad Ziman keitandsolan löudmižsijanno. Vn 1975 vilukus kätihe Sajansk-radnikžiloks, nimitihe Päivnouzmaine Sajan-mägisel'gan mödhe. Radnikžilo sai lidnan statusad vn 1985 elokus, alištub agjan tobmudele oikti.

Lidn šingotase polivinilhloridan tehmižel i sömtegimištol (kanalihafabrik, maidkombinat).

Geografijan andmused

Lidn sijadase Okanjogen molembil randpolil (lankteb Bratskan vezivaradimhe, Angaran hurapol'ne bassein, ven.: Ока, burät.: Аха гол), 550 m ü.m.t. keskmäižel korktusel. Elänfartalad (Ok-jogen oiged randpol') oma saudud 12 kilometras himižes tegimespäi (hura randpol'). Matkad Irkutskhasai om 245 km suvipäivnouzmha orhal vai 280 km avtotedme. Lähembaine lidn da Transsiban stancii om Zim 21 km suvhe orhal, 24 km avtotedme vai Okan ülezjogen. Ühesakilometrine sarak ühtenzoitab lidnad «Sibir'»-trassanke (R-255).

Sajansk om lidnümbrikon üks'jäine eländpunkt.

Eläjad

Vn 2010 Venäman rahvahanlugemižen mödhe eläjiden lugu oli 40 800 ristitud. Kaikiš suremb ristitišt oli 47 500 eläjid vl 1996. Ortodoksižen hristanuskondan Pühän Jumalanmaman päjumalanpert' om saudud vll 1993−2003.

Professionaližen opendusen aluzkundad: Sajanskan himižtehnologijan tehnikum, medicinine kolledž i ekonomikan kolledž.

Irdkosketused

• Lidnan Duman oficialine sait (dumasayansk.ru). (ven.)
• Lidnan Administracijan oficialine sait (admsayansk.ru). (ven.)
• Sajanskan administracijan kanal youtube.com-saital. (ven.)