Suvitarav

Suvitarav (kirib.: Tarawa Teinainano, angl.: South Tarawa) om Kiribatin pälidn da kaikiš suremb lidn. Läz pol't valdkundan ristitištod eläb siš.

Suvitarav
Tarawa Teinainano (kirib.)
South Tarawa (angl.)

Valdkund	Kiribati
Eläjiden lugu (2020)	63,439 ristitud
Pind	15,76 km²
Telefonkod	+686
Aigvö	UTC+13

Tarav-atollan kart

Istorii

Suvitaravan territorii oli britanižen Gilbertan Sared i Ellis-protektoratan administrativižeks keskuseks vll 1895–1908 i 1946–1976. Toižen mail'man sodan aigan znamasine tora tegihe Suvitaravan rajonas AÜV:oiden i Japonijan imperijan merisodavägiden keskes.

Eländpunkt om ripmatoman valdkundan pälidnaks vn 1979 heinkuspäi.

Suvitarav šingotase valdkundan ohjastusen aluzkundoil, opendusen, kommercijan i transportan keskuseks. Kopranvoin tegim i merikalan ümbriradmižen tegim ratas lidnas. Reskveden mairiž i sidodud sihe mahusiden uhkund vitkostudas pälidnan šingotest.

Geografijan andmused

Lidn sijadase valdkundan lodehes, Gilbertan sariden pohjoižpalas, Tarav-atollan suves, koumhe metrhasai ü.m.t. keskmäižel korktusel.

Suvitarav levigandeb atollan nelläl sarel: Betio (meriport), Bairiki (valdkundan aluzkundad), Bonriki (läžundkodi i opendajiden kolledž), Bikenibeu (lendimport). Kaik ned sätas Teinainano-municipalitetad (angl.: Teinainano Urban Council).

Klimat om ekvatorialine vihmmecoiden. Päivän lämuz om +25..+31 C° vodes läbi, voden keskmäine lämuz' om +28,3 C°. Ekstremumad oma +21 C° i +35 C°. Paneb sadegid 2052 mm vodes, enamba tal'vkus-uhokus (212..271 mm kus), vähemba sügüz'kus-kül'mkus (110..120 mm kus). Relätivine nepsuz vajehtase 77..82 % röunoiš vodes läbi.

Eläjad

Vl 2010 lidnan eläjiden lugu oli 50 182 ristitud. Kaikiš suremb ristitišt om nügüd', se ližadui koume kerdha vspäi 1979.

Rahvahad (vn 2020 rahvahanlugemine): I-kiribati — 95,9 %, toižed rahvahad — 4,1 %.

Üks' valdkundaline i viž privatišt üläškolad (kolledžad) anttas professionališt opendust Suvitaravas.