Belinskii (lidn)

Belinskii (ven.: Бели́нский, erz.: Белинской ош) om Venäman lidn da lidnankund Penzan agjan päivlaskmas. Se om Belinskijan rajonan administrativine keskuz.

Belinskii
Белинский

Lidnanznam	Flag
Valdkund	Venäma
Eläjiden lugu (2020)	7,522 ristitud
Pind	8,33 km²
Pämez'	Vadim Samoilin (semendku 2018—)
Telefonkod	+7−84 153-xx-xxx
Avtokod	58
Aigvö	UTC+3 (MSK+0)

Istorii

Eländpunktan aluz om pandud 18. voz'sadan augotišes kuti Nikol'skoje-žilo (ven.: село Никольское) vai Pen' Čenbar (ven. Малый Ченбар). Žilo mainitase ezmäižen kerdan vn 1723 valdkundmaksoiden revizijas. Se sai makundan lidnan statusad vl 1780 Čembar-nimitusenke (ven.: Чемба́р), nimitihe jogiden mödhe. Udesnimitihe nügüdläižikš vn 1948 17. päiväl semendkud literaturan Vissarion Belinskii-arvostelijan da publicistan (1811−1848) muštoks, hänen laps'aig (1816−1829) mäni neciš lidnas.

Belinskii šingotase elektronikan komponentoiden «Kermet»-tegimel i sömtegimištol (saguden tehmine, konditerine fabrik). Venämalaižen literaturan abutuzfond radaškanzi lidnas vl 2008.

Geografijan andmused

Lidn sijadase Pen' Čembar-jogen (ven.: Малый Чембар 33 km pitte) oiktal randal tobjimalaz, Sur' Čembar- i Pen' Čembar-jogiden ühthejoksmusenno (Donan hurapol'ne bassein), 190 m ü.m.t. keskmäižel korktusel. Matkad Penzhasai om 109 km päivnouzmha orhal vai 127 km avtotel. Lähembaižed lidnad oma Kamenk (raudtestancii) 49 km pohjoižpäivnouzmha orhal vai 55 km avtotedme, i Kirsanov (Tambovan agj, raudtestancii) 58 km suvipäivlaskmha orhal vai 83 km avtotedme. «Penz — Tambov»-avtote ümbärdab lidnad ühtes kilometras pohjoižespäi.

Belinskii om lidnankundan üks'jäižeks eländpunktaks. Lidnankundan pind — 8,33 km².

Eläjad

Vl 1939 lidnan ristitišt oli 6 006 eläjad. Vn 2010 Venäman rahvahanlugemižen mödhe lidnan eläjiden lugu oli 8 565 ristitud, rajonan koumandez. Kaik 7 843 eläjad oli lidnas vl 2017. Kaikiš suremb lidnan ristitišt oli enamba vai läz 9 tuhad eläjid vll 1989−2009 (9 700 rist. vll 2000−2001).

Rahvahad (2010): venälaižed — 87,1 %, mordvinalaižed — 9,5 %, totarlaižed — 1,3 %, toižed rahvahad — 2,1 %.

Ortodoksižen hristanuskondan kaks' pühäpertid oma kaičenus i avaitud lidnas: Pühän Jumalanmaman Katken jumalanpert', ph. Mitrofan Voronežalaižen časoun'.

Professionaližen opendusen aluzkund om Kamenkan tehmižtehnologijoiden da edheotaikundan tehnikum, sen Belinskijan filial.

Galerei

• 
  Muštnik Belinskijan oiktastuseks (2018)
• 
  Ph. Mitrofan Voronežalaižen časoun', vn 2021 nägu
• 
  Lidnan kirjišt i Vladimir Leninan muštnik (2018)
• 
  Rajonan kul'turan da joudan keskuz (2021)
• 
  Belinskijan pert'-muzei (2018)

Irdkosketused

• Lidnankundan lehtpoled rajonan tobmuden aluzkundoiden belinskij.pnzreg.ru-saital. (ven.)