Räpin

Räpin
Räpina
Lidnanznam;	Flag;
Valdkund	Estinma
Eläjiden lugu (2020-01-01)	2,118 ristitud
Pind	3,7 km²
Telefonkod	+372−79
Aigvö	tal'vel UTC+2,; kezal UTC+3

Räpin (estin kelel: Räpina) om lidn Estinman suvipäivnouzmas. Mülüb Pilvan makundha, sen kahtenz' lidn kahtespäi. Räpinan volostin keskuz.

Istorii

Räpin-eländpunkt oli Tartun kümnen torguindümbrikon (sid' volostin) keskes vl 1582, mainitadas volostin toižid-ki külid necil vodel. Vl 1636 Räpin om nimitadud tulendan keskuseks ezmäižen kerdan, Ročinman kunigazližen käskuzkundan dokumentas.

Rappin-miz (mugažo saksan kelel) oli bajarišton Lövenvol'de-kanzan eloks 18. voz'sadal. Miz kändihe Rihterad-kanzan ičezkaluikš 19. voz'sadal, i vl 1842 päine ižanduzpert' (nüg. Sillapäe-zamk) om saudud klassicizman stiliš. Peizažpuišt om sätud Val'ter Engel'gardtan ohjandusen al.

Kätihe Räpinad žiloks vl 1945, vll 1950−1961 se oli ühtennimižen rajonan keskuseks. Žilo sai lidnan statusad vl 1993. Vl 2002 se kadoti erižen municipalitetan statusad, ühtenzoittihe lidnad volostinke.

Räpin šingotase bumagfabrikal^[1], se om üks' kaikiš amuižembiš Evropas, radab vspäi 1734. Toine järed edheotand om sadunkazvatusen profškol^[2] vspäi 1924. Järedamb port valdmoidenke om sauvomas läz lidnad vspäi 2012 Evropan kalanpüdon fondan abul.

Geografijan andmused

Lidn seižub Vihandu-jogen randal 6 kilometras sen lanktendan sijaspäi Läminjärvhe (Peipusjärven kompleks) 30 m ü.m.t. keskmäižel korktusel. Padosein om saudud jogel, kuctas vezivaradint Räpinanjärveks.

Matkad makundan Pilv-keskushesai om 24 km päivlaskmha orhal vai 28 km avtol, Tallidnhasai om 216 km lodeheze orhal vai 248 km avtotedme Tartun ümbärtenke, Tartun keskuz om 64 kilometras. Toižed lähižed lidnad oma Pskov 60 km suvipäivnouzmha järven kal't vai 86 km avtotedme, Petseri 40 km suvhe avtol (Venäma), Viru 44 km suvipäivlaskmha orhal i tel (Estinma).

Eläjad

Vn 2011 Estinman rahvahanlugemižen mödhe eläjiden lugu oli 2 455 ristitud. Kaikiš suremb ristitišt oli 3 488 eläjad vl 1990. Rahvahad (2011): estilaižed — 85,5%, venälaižed — 12,8%, toižed rahvahad — 1,7%.

Hristanuskondan lüteranine kirh (est.: Räpina Miikaeli kirik) om vaumitud vll 1785.