Parkano

Parkano (mugažo suomen i ročin kelil) om Suomenman lidn da lidnankund valdkundan suvipäivlaskmas. Se om Pirkanma-agjan kaikiš penemb lidnankund kaks'toštkümnespäi eläjiden lugun mödhe.

Parkano

Lidnanznam
Valdkund	Suomenma
Eläjiden lugu (2020-01-01)	6,400 ristitud
Pind	909,67 km²
Pämez'	Jari Heiniluoma (viluku 2013—)
Telefonkod	+358-
Aigvö	tal'vel UTC+2, kezal UTC+3

Istorii

Municipalitetan aluz om pandud vl 1867. «Pori — Haapamäki»-raudtekeskust läbiti sidä i radaškanzi vl 1938. «Tampereh — Seinjogi»-raudtekeskust om saudud vl 1971, sen jäl'ghe Parkano tegihe raudtesol'meks. Kätihe kundad lidnanvuiččeks (suom.: kauppala) vl 1972. Parkano sai lidnan statusad (kaupunki) vl 1977.

Parkano šingotase metallan eksportan kompanijoil («Kopar Oy», «FennoSteel Oy»), mecan ümbriradmižel («Aureskosken Jalostetehdas Oy Tammisto Yhtiöt»), elektromontažan «Sähkösuomilammi Oy»-edheotandal.

Geografijan andmused

Lidn sijadase agjan lodehes, om ümbärtud penil järvil. Znamasine Parkanonjärv zavodiše lidnan suves (suom.: Parkanonjärvi 4,7 km² pindanke, 90 m ü.m.t.). Matkad agjan Tampereh-keskushesai om 69 km suvipäivnouzmha orhal, 86 km avtotel vai raudtel, Hel'sinki-pälidnhasai — 229 km suvipäivnouzmha orhal, 266 km avtotedme vai raudtedme. Toižed lähembaižed lidnad (avtol) oma Kankaanpää (Sadakund) 45 km suvipäivlaskmha i Ikaalinen 36 km suvhe.

Vl 2020 lidnankundan pind — 909,67 km², sidä kesken kuivma 852,93 km², vezi i sokaz tahond ottas 56,74 nellikkilometrad.

Kaik 9 nimitadud da nomeruidud rajonad i 17 küläd mülüdas municipalitetha, 31 valičendtarhad.

Eläjad

Vl 1980 municipalitetan eläjiden lugu oli 8 779 ristitud (kaikiš suremb ristitišt vspäi 1980), vl 2010 — 6 978 ristitud. Kaks' ristitud koumespäi elädas lidnankundan keskuses.

Kodikelen mödhe (2016): suomen kel' — 98,0%, ročin kel' — 0,1%, toižed keled — 1,9%.

Jarkko Malmberg radoi edeližen lidnanpämehen (2006−2012).

Galerei

• 
  Parkanon jumalanpert'
  (om saudud vodele 1800, vn 1899 kellčuhunduz,
  vn 2005 nägu)
• 
  Kirkkojärv (0,72 km², 144 m ü.m.t.) lidnan keskuses
• 
  Lidnan vezičuhunduz
• 
  Parkanon raudtestancii
  vl 2012

Irdkosketused

• Lidnan oficialine sait (parkano.fi). (suom.)