Orivezi

Orivezi (suom. i roč.: Orivesi, suomen virkand: [ˈoriˌʋesi], vanh suomen form om Orihvesi) om Suomenman lidn da lidnankund valdkundan suvipäivlaskmas. Se om Pirkanma-agjan ühesanz' lidnankund 12:späi eläjiden lugun mödhe.

Orivezi
Orivesi (suom. i roč.)

Lidnanznam
Valdkund	Suomenma
Eläjiden lugu (2024)	8,842 ristitud
Pind	960,08 km²
Pämez'	Juha Kuusisto (2003—)
Telefonkod	+358-
Aigvö	tal'vel UTC+2, kezal UTC+3

Lidnankundan sijaduz agjas i valdkundas (2020)

Istorii

Municipalitetan aluz om pandud vl 1869. Ühtištadihe Eräjärvi-küläkundanke vl 1973. Orivezi sai lidnan statusad vl 1986. Mülütihe Längelmäki-municipalitetan palad lidnankundha vl 2007.

Orivezi šingotase infrastrukturan sauvomižen kompanijal («KVL-Tekniikka Oy» — avtoted, energetik, torvveimed), kuldan samižel (vspäi 1994) i raudten depol.

Geografijan andmused

Lidn sijadase agjan päivnouzmas, Längelmävezi-järven pohjoižel randal (133 km², 84 m ü.m.t., suom.: Längelmävesi, Kokemäenjogen bassein). Kaik om enamba mi 350 järved municipalitetas.

Matkad agjan Tampereh-keskushesai om 38 km suvipäivlaskmha orhal, 44 km avtotel vai raudtel, Hel'sinki-pälidnhasai — 171 km suvhe orhal, 217 km avtotedme vai raudtedme. Toižed lähembaižed lidnad (avtol) oma Kangasal 35 km suvipäivlaskmha, Mänttä-Vilppul 48 km pohjoižhe-pohjoižpäivnouzmha i Jämsä (Kesksuomenma) 51 km päivnouzmha-pohjoižpäivnouzmha.

Vn 2022 andmusiden mödhe lidnan ühthine pind oli 960,08 km², sidä kesken kuivma 799,63 km², vezi i sokaz tahond ottas 160,45 nellikkilometrad.

Tobmuz

Lidnankundan kart (2020)

Orivezin municipaline suim kogoneb 31 ezitajaspäi.

Eläjad

Vl 1980 nügüdläižen lidnankundan territorijan eläjiden lugu oli 8 854 ristitud, vl 2000 — 8 886 ristitud, vl 2010 — 9 617 ristitud (kaikiš suremb ristitišt), vl 2020 — 9 017 ristitud. Ristituiden kaks' koumendest eläb lidnankundan keskuses.

Mamankelen mödhe (2016): suomen kel' — 98,4 %, ročin kel' — 0,2 %, toižed keled — 1,4 %.

Galerei

• 
  Lidnan ohjastusen pert' (2015)
• 
  Orivezin lüteranine jumalanpert' (om saudud vll 1960−1961), vn 2015 nägu
• 
  Lidnan sportpert'kulu (om saudud vl 1988), vn 2015 nägu
• 
  Orivezin raudtestancijan sauvuz vl 2016

Irdkosketused

• Lidnan oficialine sait (orivesi.fi). (suom.)