Jämsä

Jämsä (mugažo suomen i ročin kelil, suomen virkand: [ˈjæmsæ]) om Suomenman lidn valdkundan suves. Mülüb Kesksuomenma-agjaha, sen kahtenz' lidnankund kudespäi eläjiden lugun mödhe.

Jämsä

Lidnanznam
Valdkund	Suomenma
Eläjiden lugu (2024)	19,100 ristitud
Pind	1,823,90 km²
Pämez'	Hanna Helaste (sügüz'ku 2019—)
Telefonkod	+358-
Aigvö	tal'vel UTC+2, kezal UTC+3

Lidnankundan sijaduz agjas i valdkundas (2020)

Istorii

Municipalitetan aluz om pandud vl 1866. Se sai lidnanvuittušt statusad (suom.: kauppala) vl 1969, kätihe lidnaks (kaupunki) vl 1977. Mülütihe Kuorevesi-kundad lidnha vl 2001, Längelmäki-kundad — vl 2007 (paloin), Jämsänkoski om lidnankundan palaks vspäi 2009.

Jämsä šingotase UPM-kompanijan kahtel bumagantegimel (suom.: Jokilaakson tehtaat), Patria-koncernan lendimfabrikal i aerokosmižel keskusel (ned oma üks'jäižed valdkundas), hobasižiden kengiden edheotandal. Rahvahidenkeskeine FinnMetko-ozutelend oleskeleb lidnas kerdan kahtes vodes. Himos-lebukeskuz suks'tramplinanke radab municipalitetas.

Geografijan andmused

Lidn sijadase agjan suvipäivlaskmas, Jämsänjogen randal kudes kilometras sen lanktendan sijaspäi Päijänne-järvhe.

Matkad agjan Jüväskülä-keskushesai om 58 km pohjoižhe-pohjoižpäivnouzmha kaikil teil, Hel'sinkihesai om 190 km suvhe orhal, 225 km avtotedme vai raudtedme. Lähembaine lidn om Mänttä-Vilppul (Pirkanma) 40 km lodeheze avtotedme.

Vn 2022 andmusiden mödhe lidnankundan ühthine pind om 1 823,90 km², sidä kesken kuiv ma — 1 571,39 km², vezi i sokaz ma ottas seičemendest (252,51 km², 465 järved).

Tobmuz

Lidnankundan kart ende erigoittud kundoidenke (2020)

Jämsän municipaline suim kogoneb 43 ezitajaspäi.

Ilkka Salminen radoi lidnan edeližen pämehen vll 2010–2019.

Eläjad

Vl 1980 lidnankundan ristitišt oli 26 371 eläjad, vl 2000 — 25 023 eläjad, vl 2010 — 22 691 eläjad, vl 2020 — 20 157 eläjad. Nügüdläižen lidnankundan territorijan kaikiš suremb ristitišt oli 28 261 eläjad vl 1968.

Kodikelen mödhe (2016): suomen kel' — 98,0 %, ročin kel' — 0,2 %, toižed keled — 1,8 %.

Galerei

• 
  Lidnan tobmuden pert' (2015)
• 
  Jämsän jumalanpert' (letihe vl 1929), vn 2017 nägu
• 
  «Sirkan Kahvila»-adivpert' vl 2015
• 
  Jämsän hristianine rahvahanškol (2003)
• 
  Jämsän raudtestancijan sauvuz vl 2009

Irdkosketused

• Lidnan ohjastusen sait (jamsa.fi). (suom.) (angl.)