Novoanninskii

Novoanninskii (ven.: Новоа́ннинский) om Venäman lidn da lidnankund Volgogradan agjan lodehes. Se om Novoanninskijan rajonan administrativine keskuz.

Novoanninskii
Новоаннинский

Valdkund	Venäma
Eläjiden lugu (2021)	15,791 ristitud
Pind	24,08 km²
Pämez'	Sergei Jegorov (sulaku 2021—)
Telefonkod	+7−84 447-xx-xxx
Avtokod	34, 134
Aigvö	UTC+3 (MSK+0)

Istorii

Eländpunktan aluz om pandud vl 1872 kuti Samsonovskii-futor läz Filonovo-raudtestancijad. Vl 1918 udesnimitihe futorad Novo-Annenskai-stanicaks. Vl 1936 se kätihe Novo-Annenskii-radnikžiloks. Vl 1956 radnikžilo sai lidnan statusad nügüdläiženke nimenke.

Novoanninskijan ižandusen päsarakod oma sömtegimišt (pühävoin tegim, pühävoinümbriradai tegim, lihakombinat, leibtegim) da elektromedicinižladimišton pästand. Ende valamižmehanine tegim i savičun tegim radoiba mugažo.

Geografijan andmused

Lidn sijadase Buzuluk-jogen hural randal (ven.: Бузулук 314 km pitte, Hopran hura ližajogi, Donan bassein), 87 m ü.m.t. keskmäižel korktusel. Filonovo-raudtestancii om «Volgograd — Povorino (Voronežan agj)»-keskustal vspäi 1870. Matkad Volgogradhasai om 254 km suvipäivnouzmha «Kaspii»-avtotedme (R22, edel 2018. vot M6), kudamb ümbärdab lidnad ani päivlaskmaspäi, vai raudtedme. Lähembaižed lidnad oma Mihailovk 75 km suvipäivnouzmha avtol i Urüpinsk 55 km lodeheze orhal.

Klimat om ven kontinentaline. Voden keskmäine lämuz om +6,9 C°, kezakun-elokun +19,9..+21,8 C°, tal'vkun-uhokun −5,4..−9 C°. Paneb sadegid 453 mm vodes, enamba kezakus-heinkus (46..51 mm kus), vähemba uhokus-keväz'kus (25 mm kus).

Pen' Novoanninskijan maižanduztehnikuman učhozan žilo (kahesa ristitud vl 2017) mülüb lidnankundha Novoanninskijan ližaks. Lidnankundan pind — 63,31 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 17 912 ristitud, lidnankundan — 17 920 ristitud, rajonan pol'. Kaikiš suremb lidnan ristitišt oli enamba 20 tuhad vozil 1967−2001 (20 932 rist. vl 1979). Vl 2017 kaik 16 436 ristitud eliba lidnas.

Ortodoksižen hristanuskondan kaks' pühäpertid oma avaitud lidnas: ph. Feofan-eriželäjan jumalanpert' (om saudud vll 2000−2017) i Jumalanmaman Emäganpäivän časoun'.

Novoanninskijan maižanduzkolledž om lidnan professionaližen opendusen aluzkundaks.

Edeline lidnan pämez' (Administracijan pämez') om Aleksandr Türin (reduku 2011 — sulaku 2021).

Galerei

• 
  Rahvahanikoiden sodan ühtnijoiden i pölištunuziden Stalingradan toras nevondkundaližiden sodamehiden velleskaum (2018)
• 
  Federaline R22 «Kaspii»-trass lidnas vl 2007
• 
  Filonovo-stancijan nägu raudteiden polespäi vn 2023 sulakus

Irdkosketused

• Novoanninskijan lidnankundan tobmuden sait (city-newanna.ru). (ven.)