Krasnoslobodsk (Volgogradan agj)

Krasnoslobodsk (ven.: Краснослобо́дск) om Venäman lidn Volgogradan agjan suves. Se om Volgogradan päivnouzmaine ezilidn, mülüb Volgogradan lidnaglomeracijha (1,4 mln. rist.). Lidn rajonan alištusenke om lidnankundan keskuseks Keskmäižen Ahtuban rajonas, sen kaikiš suremb eländpunkt da üks'jäine lidn.

Krasnoslobodsk
Краснослободск

Lidnanznam
Valdkund	Venäma
Eläjiden lugu (2021)	16,838 ristitud
Pämez'	Nikolai Semiletov (tal'vku 2020—)
Telefonkod	+7−84 479-xx-xxx
Avtokod	34, 134
Aigvö	UTC+3 (MSK+0)

Sil sanal voib olda toižid znamoičendoid; miše nähta niid, tulgat tänna.

Istorii

Eländpunktan aluz om pandud vl 1870 kuti Bukatin-futor, ezmäižen tulnuden elämižhe kanzan nimen mödhe. Vl 1923 futor nimitaškanzihe Rusttaks Slabadaks (Rusked Slabad — ven.: Красная Слобода). Vl 1938 slabad' kändihe radnikžiloks. Vl 1955 Rusked Slabad sai lidnan statusad nügüdläiženke nimenke.

Ei ole surid edheotandoid lidnas, privatine leibänedheotand radab. Krasnoslobodsk om kottedžpertišton rajon. Ende laivansauvomižen tegim, kalategim i kaks' mebel'fabrikad oliba lidnas.

Geografijan andmused

Lidn sijadase Volg-jogen hural randal, se om vastrand Volgogradaspäi. Matkad Volgogradhasai om üks' kilometr päivlaskmha, Keskmäine Ahtub-radnikžilhosai (rajonkeskuz) — 24 km päivnouzmha avtotedme. Volgogradan avtotesild ühtenzoitab jogen randoid vspäi 2009.

Kaks' pen't žilod mülüdas lidnankundha Krasnoslobodskan ližaks. Lidnankundan pind om 66,19 km².

Eläjad

Vn 2010 Venäman rahvahanlugemižen mödhe lidnan eläjiden lugu oli 15 998 ristitud, lidnankundan — 17 254 ristitud. Kaikiš suremb lidnan ristitišt oli 19 tuhad eläjid vozil 1957 i 1967. Vl 2017 kaik 17 405 ristitud elihe lidnas i 18 786 ristitud kaikes lidnankundas.

Ortodoksižen hristanuskondan kaks' jumalanpertid oma avaitud lidnas: Mikulai-čudonsädajan (vspäi 2003) i Eläban Eziauguižen Stroican (vspäi 2007).

Volgogradan vezitransportan tehnikuman Krasnoslobodskan filial (ende proflicei Aleksandr Nevalaižen nimed) om lidnan professionaližen opendusen aluzkundaks.

Edeline lidnankundan pämez' om Vladimir Surkov (2016−2020).

Galerei

• 
  Venäman kazmuzvodindan tedoinstitutan Vavilovan nimed eksperimentaline stancii vl 2012
• 
  «Klub rečnikov»-kul'turkeskuz (2021, Jogimehiden klub)
• 
  Debarkader lidnan valdmoidenno vl 2011

Irdkosketused

• Lidnan tobmuden oficialine sait (krasnoslobodsk-admin.ru). (ven.)