Šen'čžen'

Šen'čžen' (kit.: 深圳, pin'jin': Shēnzhèn, sana sanha «süvä pöudoidenkeskeine sija») om Kitain lidn Guandun-agjas, sen kahtenz' surtte lidn (Guančžoun jäl'ghe), agjale alištusen lidn.

Šen'čžen'
深圳
(Shēnzhèn)

Valdkund	Kitai
Eläjiden lugu (2014)	10,630,000 ristitud
Pind	1,991,64 km²
Pämez'	Süi Cin' (许勤)
Telefonkod	+86−755
Aigvö	UTC+8

Se om Kitain elektrotehnižen tegimišton da il'mtorguindan kaikiš järedamb keskuz.

Istorii

Nügüdläižen lidnan sijas lidnalaine eländpunkt oli olmas 4. voz'sadaspäi meiden erad. Eländpunkt mainitase ezmäižen kerdan vl 1410, nügüdläižen lidnan aluz om pandud vl 1979.

Vn 1980 1. päiväl semendkud Kitain ezmäižen specialižen ižanduzzonan aluz om pandud tulijan lidnan nelläs rajonas vedatamha verhanmaižiden investicijoid valdkundha. Aigan joksten vs 2010 heinkuspäi kaik lidn tegihe mugoižen zonan nügüdläižiš röunoiš.

Geografijan andmused

Lidn sijadase Kitain suves, Hel'mjogen suhišton hural randal. Kitain toižed sured lidnad oma läz: Honkong om ani suviröunan taga, Dunguan' seižub pohjoižpolel, Guančžou (agjan pälidn) sijadase pohjoižpolehe edemba.

Kitain Suvimeren randanpird otab 230 km Šen'čženin röunoiš. Se om jagadud kahthe palaha Koulunan pol'sarel. Lidnan keskuz seižub 12 metrad valdmeren pindan päl korktusel. Lidnan röunoiš mägiden korktuz sase 944 metrhasai.

Klimat om subtropine mussonine, neps da räk. Heinkun da elokun keskmäine lämuz om +29 C°, vilukun da uhokun — +16 C°. Paneb sadegid 1935 mm vodes. Kezal om vihmsezon, paneb 320..350 mm kus. Kuivsezonal (kül'mku-uhoku) paneb 25..50 mm kus.

Šen'čžen' jagase 4 lidnrajonha-ümbrikho (Lohu, Futän', Nan'šan', Jantan') da 6 ezilidnümbrikho. Nened 10 rajonad alajagasoiš 59 alaümbrikho.

Eläjad

Vn 2010 kaiken Kitain rahvahanlugemižen mödhe lidnrajoniden ristitišt oli 3 538 275 eläjad, pind — 412 km².

Ižanduz

Šen'čženin kogosüdäiprodukt om 1,6 trln CNY (260 bln US$ vl 2014, nellänz' sija valdkundas Pekinan, Šanhain da Guančžoun jäl'ghe).

Huawei da BYD Auto mail'man kompanijoiden päfaterad sijadasoiš lidnas, mugažo Foxconn- da Lenovo-kompanijoiden tegimed. iPhone- da iPad-ladimiden tobjad palad tehtas Šen'čženiš.

Ižandusen uded da znamasižed sarakod oma biotehnologine tegimišt, rahaazjoiden holituz, internet-industrii.

Transport

Avtobusad, metro, taksid da ehtatimed oma kundaližeks transportaks lidnan südäimes. Metro radab vspäi 2004 (vl 2014 5 jonod, 118 stancijad, 177 km raudted). Lidnan port otab 22 km mererandištod.

Rahvahidenkeskeine civiline «Šen'čžen' Baoan'»-lendimport (SZX) sijadase 35 kilometras lodeheze lidnan keskusespäi. Sišpäi tehtas reisid Azijan äjihe verhiže maihe, Evropha, AÜV:oihe da Egiptha, mugažo Kitaidme.

Irdkosketused

• Šen'čžen'-lidnan Rahvahaližen ohjastusen oficialine sait (english.sz.gov.cn). (angl.) (kit.)