Suonenjogi

Suonenjogi (suom. i roč.: Suonenjoki, suomen virkand: [ˈsuo̯nenjoki]) om Suomenman lidn da lidnankund valdkundan suvipalan keskuses. Se om Pohjoižsavo-agjan kaikiš penemb lidnankund videspäi eläjiden lugun mödhe.

Suonenjogi
Suonenjoki (suom. i roč.)

Lidnanznam
Valdkund	Suomenma
Eläjiden lugu (2024)	6,670 ristitud
Pind	862,34 km²
Pämez'	Juha Piiroinen (sügüz'ku 2013—)
Telefonkod	+358-
Aigvö	tal'vel UTC+2, kezal UTC+3

Lidnankundan sijaduz agjas i valdkundas (2020)

Istorii

Municipalitetan aluz om pandud vl 1865. Raudte läbiti kundan keskust vl 1889. Kätihe lidnanvuiččeks (suom.: kauppala) vl 1967, anttihe lidnan statusad (kaupunki) vl 1977.

Suonenjogi šingotase temašiništon pästandal («Arctic Machine»), kleidüd brusan tegimel («Finland Laminated Timber»), mecpilindan tegimel («Iisveden Metsä Oy»), sömtegimištol (maidtegim i keitišen tegim). Sadmanzikaižen avar kazvatand mäneb 1940-nziš vozišpäi, äi ristitud ajeltas poimdä sidä kezal kaikes valdkundaspäi i verhiš maišpäi. Suomenman mectedoinstitutan alajaguz i koume muzejad ratas kundas mugažo.

Geografijan andmused

Lidn sijadase agjan suviröunanno, Suontienselkä–Paasvezi-järven randišton lodehližes čogas (suom.: Suontienselkä–Paasvesi 58 km² pindanke, 99 m ü.m.t.).

Matkad agjan Kuopio-keskushesai om 41 km pohjoižpäivnouzmha orhal, 52 km avtol vai raudtel, Hel'sinki-pälidnhasai om 297 km suvhe-suvipäivlaskmha orhal, 334 km avtotedme vai raudtedme. Toižed lähembaižed lidnad oma Varghuz 52 km suvipäivnouzmha orhal vai 66 km avtotedme, Pieksämägi (Suvisavo) 37 km suvhe orhal, 42 km avtotedme vai raudtedme, i Jüväskülä (Kesksuomenma) 83 km suvipäivlaskmha orhal vai 97 km avtol. Suonenjogin raudtestancii radab «Iisalmi — Kouvol»-keskustal.

Vn 2022 andmusiden mödhe lidnankundan pind om 862,34 km², sidä kesken kuivma — 713,56 nellikkilometrad, vezi i sokaz tahond ottas 148,78 km².

Tobmuz

Kaik 16 kundan keskusen rajonad i 31 küläd alištudas lidnan tobmudele. Suonenjogin municipaline suim kogoneb 27 ezitajaspäi, heišpäi 12 valičesoiš lidnan keskusespäi.

Olavi Ruotsalainen radoi edeližen lidnanpämehen vn 2013 sügüz'kuhusai, hän om Suonenjogin kundan suiman ezimeheks vn 2017 heinkuspäi.

Eläjad

Vl 1980 lidnankundan eläjiden lugu oli 9 110 ristitud (kaikiš suremb ristitišt vspäi 1980), vl 2000 — 8 048 ristitud, vl 2010 — 7 598 ristitud, vl 2020 — 7 060 ristitud. Koume ristitud nelläspäi elädas lidnankundan keskuses.

Vn 2016 andmusiden mödhe suomen kel' om mamankeleks 97,7 % täht lidnalaižišpäi, toižed keled — 2,3 %.

Galerei

• 
  Lidnan kirjišt i čomamahtoline galerei (2019)
• 
  Suonenjogin lüteranine jumalanpert' (om saudud vl 1865), vn 2017 nägu
• 
  Tervhudenkaičendan keskuz vl 2020
• 
  Suonenjogin aluzškol i norišton aluzkundad (sauvusen hura pol', 2019)
• 
  Suonenjogin raudtestancii vl 2019

Irdkosketused

• Lidnan oficialine sait (suonenjoki.fi). (suom.)