Žerdevk

Žerdevk (ven.: Же́рдевка) om Venäman lidn da lidnankund Tambovan agjan suves. Se om Žerdevkan rajonan administrativine keskuz.

Žerdevk
Жердевка

Lidnanznam	Flag
Valdkund	Venäma
Eläjiden lugu (2021)	13,825 ristitud
Pind	16,98 km²
Pämez'	Nikolai Kaširin (tal'vku 2017—)
Telefonkod	+7−47 535-xx-xxx
Avtokod	68
Aigvö	UTC+3 (MSK+0)

Istorii

Eländpunktan aluz om pandud kuti Čibizovk-žilo (ven.: село Чибизовка). Se šingotaškanzihe, konz saudihe «Gräzi — Caricin»-raudtekeskustad vl 1869. Raudte mäni läz žilod, stancijan eziauguine nimituz oli Burnak (ven. Бурнак volostin keskusen mödhe). Udesnimitihe stancijad Žerdevk:aks vn 1905 kül'mkus lähižen külän mödhe. Sen külän aluz oli pandud ühteks pertikš vl 1745 F. Žerdev-bajaril. Žilo sai lidnan statusad nügüdläiženke nimenke vn 1954 15. päiväl heinkud, mülütihe raudtestancijad i sahartegimen žilod lidnha kerdalaz.

Žerdevk šingotase mehanižel tegimel i sömtegimištol (sahartegim, voitegim, lihakombinat, elevator). Nevondkundaližen aigan maploduiden kuivateztegim i savičtegim radoiba mugažo.

Geografijan andmused

Lidn sijadase rajonan suves, Saval-jogen randoil (ven.: Савала́ 285 km pitte, Donan hurapol'ne bassein), 110 m ü.m.t. keskmäižel korktusel. Matkad Voronežan agjhasai om 3 km suvhe orhal. Matkad Tambovhasai om 100 km pohjoižhe orhal, 120 km avtotel vai 300 km raudtel. Lähembaižed lidnad oma Uvarovo 56 km päivnouzmha orhal, 78 km avtotedme vai 272 km raudtedme, i Ertil' (Voronežan agj) 46 km päivlaskmha orhal, 84 km avtotedme vai 100 km raudtedme. Žerdevk-raudtestancii radab lidnan päivnouzmas.

Žerdevk om lidnankundan üks'jäine eländpunkt. Lidnankundan pind — 16,98 km².

Eläjad

Vl 1959 lidnan ristitišt oli 15 267 eläjad. Vn 2010 Venäman rahvahanlugemižen mödhe eläjiden lugu oli 15 209 ristitud, rajonan pol'. Kaikiš suremb lidnan ristitišt oli 18..19 tuhad eläjid vll 1979−2001 (19 500 rist. vl 1996).

Rahvahad (2010): venälaižed — 97,2%, toižed rahvahad — 2,8%.

Ortodoksižen hristanuskondan ph. Aleksandr Nevalaižen jumalanpert' om olmas lidnas vspäi 1994.

Žerdevkan sahartegimišton kolledž om lidnan professionaližen opendusen aluzkundaks.

Galerei

• 
  Bankan sauvuz (2010)
• 
  Ižanduzlauk änikištonke
• 
  Memorial lidnan pölištunuziden eläjiden muštoks Toižen mail'man sodan aigan vl 2010

Irdkosketused

• Lidnan lehtpoled rajonan tobmuden aluzkundoiden zherdevka.ru-saital. (ven.)