Rasskazovo

Rasskazovo (ven.: Расска́зово) om Venäman lidn da lidnümbrik Tambovan agjan keskuzpalan päivnouzmas. Se om agjan koumanz' lidn eläjiden lugun mödhe, om Rasskazovon rajonan administrativižeks keskuseks, ei mülü sihe.

Rasskazovo
Рассказово

Lidnanznam	Flag
Valdkund	Venäma
Eläjiden lugu (2021)	47,644 ristitud
Pind	36,12 km²
Pämez'	Aleksei Pozdnäkov (kül'mku 2023—)
Telefonkod	+7−47 531-xx-xxx
Avtokod	68
Aigvö	UTC+3 (MSK+0)

Istorii

Eländpunktan aluz om pandud vl 1697 kuti Rasskazovo-žilo, konz Moršanskan Stepan Rasskaz Vodänov-manmez' sai carin laskendad panemha alust. Žilo kändihe järedaks, Venälaižen imperijan vatken tehmižen znamasižeks keskuseks. Nell' vatefabrikad i äiluguižed nahkan ümbriradajad edheotandad radoihe 19. voz'sadal. Šingotihe kut vanhuskolaižiden religiijoksmusiden keskuz. Žilo sai lidnan statusad vl 1926.

Rasskazovo šingotase erazvuiččiden sarakoiden tegimil: elektrotehnine, nahkoiden, biohimine, metalližkonstrukcijoiden, sauvondmašinoiden kohenduz, mugažo linduiden plemferm radab.

Geografijan andmused

Lidn sijadase rajonan keskuzpalan lodehes, Mectambov-jogen oiktal randal tobjimalaz (ven.: Лесной Тамбов 89 km pitte, Okan oigedpol'ne bassein), 150 m ü.m.t. keskmäižel korktusel. Arženk-jogi (ven. Арженка 14 km pitte) lankteb Mectambovha lidnan suves. Matkad Tambovan röunhasai om 23 km päivlaskmha orhal vai 26 km avtotel. Toine lähembaine lidn om Kotovsk 27 km päivlaskmha orhal vai 41 km avtotedme.

«Tambov — Kirsanov»-avtotekeskust läbitab lidnad i ümbärdab sidä pohjoižespäi. Platonovk-raudtestancii kahtes kilometras pohjoižpäivnouzmha lidnaspäi i Rasskazovo-seižutezpunkt kümnes kilometras lodeheze (ende stancii) oma lähembaižel raudtel, ned ratas «Tambov — Saratov»-keskustal vspäi 1870.

Tobmuz

Rasskazovo om lidnümbrikon üks'jäižeks eländpunktaks. Lidnümbrikon pind — 36,12 km².

Lidnümbrikon tobmuden pämez' om sen Administracijan pämez'. Edeline Administracijan pämez' om Aleksei Kolmakov, radoi vn 2010 heinkuspäi. Lidnümbrikon Deputatoiden nevondkundan ezimez' om Dmitrii Zozulenko vn 2023 sügüz'kuspäi.

Eläjad

Vl 1897 lidnan ristitišt oli 12 tuhad eläjid, vl 1939 — 30 800 eläjad. Vn 2010 Venäman rahvahanlugemižen mödhe lidnan eläjiden lugu oli 45 484 ristitud. Kaik 43 758 eläjad oli lidnas vl 2017. Kaikiš suremb lidnan ristitišt oli 48..50 tuhad eläjid vll 1989−2001 (50 800 rist. vl 1990).

Rahvahad (2010): venälaižed — 98,1 %, toižed rahvahad — 1,9 %.

Ortodoksižen hristanuskondan koume pühäpertid oma saudud lidnas: ph. Johann-jumalantedajan jumalanpert' i časoun' senno, ph. Jekaterina Aleksandrijalaižen jumalanpert'.

Rasskazovon industrialiž-tegimištoline tehnikum om lidnan professionaližen opendusen aluzkundaks.

Galerei

• 
  Lidnan administracijan pert' (2014)
• 
  Ph. Johann-jumalantedajan pühäpert' (vn 2018 nägu)
• 
  Aseevoiden (Arženskai)-vatefabrikan jändused (kul'turjäl'guz, oli rados edel 2004. vot)
• 
  Sädamiženpert' (2017, ende molokanoiden loičendpert')
• 
  Aseevoiden erižpert' usadibanke vl 2016

Irdkosketused

• Rasskazovo-lidnan tobmuden aluzkundoiden sait (g31.tmbreg.ru). (ven.)