Spassk Dal'nii

Spassk Dal'nii (ven.: Спасск-Да́льний) om Venäman lidn da lidnümbrik Merenrandaližen randan päivlaskmas, lidn randan alištusenke. Om Spasskan rajonan administrativižeks keskuseks, ei mülü rajonha.

Spassk Dal'nii
Спасск-Дальний

Lidnanznam
Valdkund	Venäma
Eläjiden lugu (2024)	34,822 ristitud
Pind	43,49 km²
Pämez'	Andrei Bessonov (keväz'ku 2020—)
Telefonkod	+7−42 352-xx-xxx
Avtokod	25, 125
Aigvö	UTC+10 (MSK+7)

Istorii

Vl 1906 saudihe Jevgen'jevk-raudtestancijad «Vladivostok — Habarovsk»-jonol i radnikžilod stancijanno. Sen ližaks, panihe Spasskai-slabadan alust läheli. Vl 1917 ühtištadihe niid, nimitihe Spassk-Primorskii-lidnaks. Vl 1929 udesnimitihe nügüdläižikš. Spasskoje-külä (vspäi 1886, 5778 rist. vl 2010) sijadase lidnan lodehližen röunan taga, no sen da lidnan infrastruktur om ühthine.

Spassk Dal'nijan ižandusen päsarakod oma sauvondmaterialiden tehmine (cement, trotuarapakut, rusked savič, sauvondsegoitused, pumaterialad, šebin', lete, produkcii metallprofiläspäi i vanutud metallaspäi, raudbetontegesed) i sömtegimišt (konservad maploduišpäi, pol'fabrikatad, konditerižed tegesed), mugažo omblendfirm, lehtezraudpakuitesen edheotand i lendimiden suren kohendusen kompanii ratas lidnas.

Geografijan andmused

Lidnan sijaduz vn 2019 randan kartal

Lidn sijadase Hankajärven alangištos, peniden Kulešovkan i Spasovkan jogidenkeskeižes. Spassk Dal'nii seižub 100 m ü.m.t. keskmäižel korktusel, Kulešovk-jogen (edel 1972. vot Santahez) oiktal randal tobjimalaz, se lankteb Spasovk-jogehe (edel 1972. vot alajoksmuz nimitihe Santahez:aks, Hankajärven da Ussuri-jogen bassein) huralpäi ani lidnan röunan taga. Om pöudoid kazvatamha risad lodeheze lidnaspäi.

Matkad Hankajärvhesai om kaks'kümne kilometrad lodeheze, Vladivostokhasai om 178 km suvipäivlaskmha orhal vai 225 km «Ussuri»-avtotedme.

Klimat om ven mussonine. Voden keskmäine lämuz om +4,0 C°, kezakun-elokun +18,2..+21,6 C°, tal'vkun-uhokun −13,2..−18,2 C°. Ekstremumad oma −42 C° i +37 C°. Paneb sadegid 659 mm vodes, enamba semendkus-sügüz'kus (75..108 mm kus), vähemba tal'vkus-uhokus (14..23 mm kus). Il'man keskmäine vozne relätivine nepsuz om 70 %.

Tobmuz

Spassk Dal'nii om lidnümbrikon üks'jäižeks eländpunktaks.

Edeline lidnan pämez' om Väčeslav Kvon (eloku 2016 — uhoku 2020).

Eläjad

Vn 2010 Venäman rahvahanlugemižen mödhe lidnan eläjiden lugu oli 44 173 ristitud, vn 2021 — 35 732 ristitud. Kaik 41 127 eläjad oli lidnas vl 2017. Kaikiš suremb lidnan ristitišt oli 61 400 eläjad vl 1992.

Ortodoksižen hristanuskondan nell' pühäpertid oma saudud lidnas i rajonan Spasskoje-žilos: Sündun Voznesenjan, Mikulai-čudonsädajan i Spasan Toižetamižen jumalanpertid, Sündun Eläbzdusen Pühäpertin Udištandan časoun'.

Lapsiden opendusen aluzkundad oma severz'-se päivkodid, keskškolad. Professionaližen opendusen aluzkundad: Spasskan industrialiž-ekonomine kolledž, politehnine kolledž, pedagogine kolledž (jäl'gmäine sijadase rajonan Spasskoje-žilos ani lidnan röunan taga).

Transport

Avtobusad oma kundaližeks transportaks lidnas. Transsiban Spassk Dal'nii-raudtestancii sijadase lidnan pohjoižpalas, ezilidnelektrojonused ajadas Vladivostokan ümbrišthosai.

«Ussuri»-avtote (A-370) ümbärdab lidnad suvipäivnouzmaižeks röunaks. Avtote mäneb Hankajärvhesai, lebubazoidenke teverenno.

Galerei

• 
  Torguindkeskused Sovetskai-irdal (2011)
• 
  «Avrora»-kinoteatr (2011)
• 
  Cementantegim vl 2014
• 
  Lotos-adivpert' (2011)
• 
  Spassk Dal'nii-päraudtestancijan sauvuz vl 2020

Irdkosketused

• Lidnümbrikon tobmuden sait (spasskd.ru). (ven.)