Puatje

Puatje (franc.: Poitiers [pwatje]) om lidn da kommun Francijan keskuzpalan päivlaskmas. Se om Vjenn-departamentan administrativine keskuz, mülüb Uz' Akvitanii-regionha.

Puatje
Poitiers

Lidnanznam
Valdkund	Francii
Eläjiden lugu (2021)	90,240 ristitud
Pind	42,11 km²
Pämez'	Leonore Monkondjui (mandat heinku 2020 — 2026, Léonore Moncond'huy)
Aigvö	tal'vel UTC+1, kezal UTC+2

Lidnan kart (2011)

Istorii

Eländpunktan aluz om pandud 2. voz'sadal EME, mainitase kuti Lemonum. Rimalaižen imperijan aigan lidnan nimituz oli Piktavium. Riman amfiteatr i kül'betid oliba saudud siš, rušihe jändusid 19. voz'sadal. Torad Puatjenno tegisoiš vll 507, 732 i 1356 lidnan sijadusen tagut platol mägidenkeskeižes, se plato ühtenzoitab Francijan pohjošt i suved.

Puatje šingotase turizmal, «Futuroscope»-tehnoparkal (kaks' millionad tulijoid vodes), lugendladimiden tegimel. Armijan palakundad seištas lidnanno.

Geografijan andmused

Lidn sijadase Klen-jogen randal (franc.: Clain, Luaran hurapol'ne bassein), 65..144 m korktusil, 75 m ü.m.t. keskmäižel korktusel. Matkad Parižhasai om 295 km pohjoižhe-pohjoižpäivnouzmha orhal vai 340 km avtoteidme.

Klimat om ven valdmeren. Keza om päivoikaz lujas, tal'vaig om pil'vekaz. Voden keskmäine lämuz om +11,7 C°, kezakun-sügüz'kun +16,3..+19,6 C°, tal'vkun-uhokun +4,7..+5,3 C°. Ekstremumad oma −17,9 C° (viluku) i +40,8 C° (heinku). Kezaaigan minimum om +0,8 C° (kezaku, eloku, sügüz'ku), tal'vaigan maksimum om +23,4 C° (uhoku). Ei voi panda halad kezakus-sügüz'kus. Paneb sadegid 686 mm vodes, läz tazomäras kuidme, enamba redukus-tal'vkus (69..76 mm kus), vähemba elokus (41 mm). Paneb lunt 11 päiväd tal'ves keskmäras. Kun keskmäine relätivine nepsuz vajehtase 70..77 % röunoiš keväz'kus-sügüz'kus, 82..88 % redukus-uhokus.

Tobmuz

Lidnan kümne fartalad (2024)

Sur' Puatje-lidnümbrik jagase videks nomeruidud kantonaks (Puatje-1.. Puatje-5) valičendoiden meton täht. Puatje-lidn i sen seičeme ezilidnad mülüdas lidnümbrikho.

Edeline lidnan pämez' (mer, franc.: maire de Poitiers) om Alen Klae (Alain Claeys, keväz'ku 2008 — heinku 2020).

Eläjad

Vl 2006 lidnan eläjiden lugu oli 88 776 ristitud. Vl 2016 lidnan ristitišt oli 87 961 eläjad. Kaikiš suremb lidnan ristitišt oli 89 253 eläjad vl 2007 i om nügüd'. Kaik 258 837 ristitud elädas ezilidnoidenke (2014).

Puatjen universitet radab vspäi 1431 (franc.: Université de Poitiers, UP, 25 tuh. üläopenikoid vl 2016). Universitet kogoneb seičemes departamentaspäi i kudes institutaspäi. Sen ližaks kaks' inženerišt školad i kaks' biznesškolad ratas lidnas (üksin alištudas universitetale). Üläopenikoiden lugu ühtele lidnalaižele om kaikiš suremb valdkundas.

Galerei

• 
  Keskuztorg lidnan ohjastusen pertin ocseinänke tagamal (2012)
• 
  Sen-Pjer-päjumalanpert', vn 2014 nägu
• 
  Katoline Notr-Dam-la-Grand-jumalanpert', vn 2008 nägu
• 
  Inženerine korged škol (2011)
• 
  Leon-Blum-viaduk raudteiš päliči vl 2014 (om vaumitud sil-žo vodel)

Sebruzlidnad

• Portugalii Koimbr, Portugalii (1979)

Irdkosketused

• Lidnan oficialine sait (poitiers.fr). (fr.)