Oblučje

Oblučje (ven.: Облучье, jidiš: ‏אָבלוטשיע Oblutšje) om Venäman lidn da lidnankund Evrejan avtonomižen agjan lodehes. Se om avtonomižen agjan kahtenz' surtte lidn kahtespäi i kahtenz' eländpunkt eläjiden lugun mödhe, Oblučjen rajonan administrativine keskuz (vspäi 1945).

Oblučje
Облучье

Valdkund	Venäma
Eläjiden lugu (2018)	8,540 ristitud
Pind	28 km²
Pämez'	Konstantin Krilov (reduku 2012—)
Telefonkod	+7−42 666-xx-xxx
Avtokod	79
Aigvö	UTC+10 (MSK+7)

Istorii

Eländpunktan aluz om pandud vl 1911 kuti Sololi-žilo (ven.: посёлок Сололи) sauvomha Amuran raudted, nimitihe Pen' i Sur' Sololi-jogiden mödhe. Vodele 1915 Oblučje-raudtestancii da Oblučjen tonnel' oliba vaumhed, i udesnimitihe žilod nügüdläižikš. Vl 1928 se kändihe lidnanvuiččeks žiloks. Vl 1938 žilo sai lidnan statusad.

Oblučjen ižandusen päsarakod oma kuldan samine, raudten holituz, kivivoin varažomad. Raudkivendon koncentratan tehmine om saudud 30 kilometras lidnaspäi (vspäi 2016, Kimkanan i Sutaran kivendkoncentrirui kombinat).

Geografijan andmused

Lidn sijadase röunanno Amuran agjanke, Hingan-jogen hural randal tobjimalaz (Amuran hura ližajogi). Mäged kaitas lidnan territorijad pohjoižpolespäi, sen tagut lidnan klimat om pehmdemba. Sodunu tazangišt levigandeb suvhe lidnaspäi. Matkad Birobidžanhasai om 140 km päivnouzmha orhal vai 170 km «Amur»-avtotedme (R-297). Toižed lähembaižed lidnad oma Raičihinsk i Zavitinsk (Amuran agj) 150 km lodeheze orhal, 190 km avtotel vai raudtel.

Vs 2012 kezakun 27. päiväspäi lidnankund om olmas nügüdläižiš röunoiš. Lidnanvuitte Hingansk-žilo (1 219 rist. vl 2018), 2 küläd da 2 raudtestancijad mülüdas lidnankundha Oblučjen ližaks. Lidnankundan pind om 2180,36 km².

Tobmuz

Lidnankundan käskusenandai tobmuz om Ezitajiden Suim (ven.: Собрание депутатов) 14 ühtnijanke. Kaik rahvaz valičeb heid videks vodeks. Suiman ühtnijoiden järgenduseližed valičendad oliba vn 2017 10. päiväl sügüz'kud (2. kucund). Konstantin Krilov radab sen ezimehen da lidnankundan pämehen. Ezitajiden Suim paneb lidnankundan administracijan pämest radsijha.

Vs 2013 uhokun 6. päiväspäi Aleksandr Golovatii radab lidnankundan administracijan pämehen. Ezmäine varapämez' da kaks' muite varapämest oma hänele abhu. Viž palakundad da komitet alištudas administracijan pämehištole.

Eläjad

Vn 2010 kaiken Venäman rahvahanlugemižen mödhe lidnan eläjiden lugu oli 9 303 ristitud, lidnankundan — 9 393 ristitud. Lidnan kaikiš suremb ristitišt oli 15 277 eläjad vn 1959 rahvahanlugemižen mödhe. Vl 2018 kaik 9 766 ristitud elädas lidnankundas. Ortodoksižen hristanuskondan Sündun Toižetamižen pühäpert' i ph. Spiridonan časoun' oma olmas lidnas.

Rahvahad (2010): venälaižed — 96,1%, ukrainalaižed — 1,3%, toižed rahvahad — 2,6%.

Oblučje-lidnan Tehnine kolledž om üks'jäine professionaližen keskopendusen aluzkund.

Transport

Lidn sijadase Transsibal, sen «Belogorsk — Habarovsk»-jonol. Raudte ümbärdab lidnan keskust pohjoižespäi, petläd kuvaten. «Amur»-avtote (R-297, «Čit — Habarovsk») ümbärdab lidnad suvespäi.

Avtobusad oma kundaližeks transportaks lidnan südäimes.

Irdkosketused

• Lidnankundan tobmuden aluzkundoiden oficialine sait (obluchye.eao.ru). (ven.)

	Evrejan avtonomižen agjan lidnad
	Birobidžan | Oblučje