Naantali

Naantali (mugažo suomen kelel, suomen virkand: [ˈnɑːntɑli], roč.: Nådendal «armahtusen alangišt») om Suomenman lidn, lidnankund da meriport Suvipäivlaskmaine Suomenma-agjas. Se om Turkun päivlaskmaine ezilidn, agjan videnz' lidn eläjiden lugun mödhe üks'toštkümnespäi.

Naantali (veps. i suom.)
Nådendal (roč.)

Lidnanznam
Valdkund	Suomenma
Eläjiden lugu (2024)	20,081 ristitud
Pind	688,24 km²
Pämez'	Laura Leppänen (keza 2021—)
Telefonkod	+358-
Aigvö	tal'vel UTC+2, kezal UTC+3

Lidnankundan sijaduz agjas i valdkundas (2020)

Istorii

Eländpunkt mainitaškanzihe kirjutadud purtkiš kuti Keskaigan katoline Vallis gratiae-tulend. Se sai lidnan oiktusid vl 1443. Sauptihe katolišt tulendad 16. voz'sadal, vajehtihe lüteranižeks, i Naantali šingotihe korväččiden čulkoiden tehmižel. Panihe muitad lidnha 18. voz'sadan keskes. Suomenman prezidentan kezaline «Kultaranta»-rezidencii om olmas lidnas vspäi 1922. Todesine änikoičend tuli 1950-nzil vozil mašinansauvomižen edheotandoiden sauvondanke. Vl 1964 ühtištadihe Naantalin küläkundad lidnanke, vl 2009 — koumed sar'hišt municipalitetad: Merimasku, Rümättülä (suom.: Rymättylä) i Velkua.

Naantali šingotase elektrostancijal i kivivoinümbriradajal tegimel (molembad oma «Fortum» palad), meriportal (koumanz' valdkundas jüguiden vedusen mödhe), tehnižiden voiden tegimel («ExxonMobil»), turizmal (järed spa-kurort, kaks' tematišt puištod, sidä kesken «Muumimaailma»), mugažo «Tata Steel»-kompanijan holituzkeskuz radab lidnas.

Geografijan andmused

Lidn sijadase agjan keskuzpalas, Baltijan meren merikaran randal. Luonnonmaa-sar' om ani suvipäivlaskmha lidnan keskusespäi, ristitišton tobj pala eläb kontinental.

Agjan Turku-keskuz om ani päivnouzmha, 14 km sen keskuzpalhasai avtotedme. Matkad Hel'sinki-pälidnhasai om 164 km päivnouzmha orhal vai 181 km avtotedme. Toine lähembaine lidn om Raisio ani pohjoižpäivnouzmha. Raudte i purulaiv ühtenzoittas Naantalid Turkunke.

Vn 2022 andmusiden mödhe lidnankundan ühthine pind — 688,24 km², sidä kesken kuivma 312,57 km², vezi da sokaz tahond ottas 3,86 nellikkilometrad, meri — 371,81 km².

Tobmuz

Lidnan enččiden kundoiden kart (2020)

Naantalin municipaline suim kogoneb 43 ezitajaspäi.

Radoiba lidnan pämehikš: Jorma Kallio (1976–2000), Timo Kvist (2000–2014), Martti Sipponen (2012–2014, velgusentäutai), Jouni Mutanen (sügüz'ku 2014 — keza 2021).

Eläjad

Vl 1980 lidnankundan eläjiden lugu oli 11 328 ristitud, vl 2000 — 16 743 ristitud, vl 2010 — 18 596 ristitud, vl 2020 — 19 301 ristitud. Kaikiš suremb kundan ristitišt om nügüd'. Kuz' ristitud seičemespäi elädas lidnankundan keskuses.

Mamankelen mödhe (2016): suomen kel' — 96,6 %, ročin kel' — 1,3 %, toižed keled — 2,1 %.

Galerei

• 
  Lidnan ohjastusen pert' (2011)
• 
  Naantalin jumalanpert' (om saudud vl 1480), vn 2008 nägu
• 
  Kivivoinümbriradai tegim vl 2013
• 
  Lidnan spa-adivpert' (2003)
• 
  Naantalin meriport i elektrostancii vl 2008

Irdkosketused

• Lidnan tobmuden sait (naantali.fi). (suom.) (roč.) (angl.)