Armänsk

Armänsk (ven.: Армянск, ukr.: Армянськ, krim.-tat.: Эрмени Базар / Ermeni Bazar) om lidn Kriman pohjoižes. Se om Armänskan lidnümbrikon administrativine keskuz.

Armänsk
Армянск (ven.)
Армянськ (ukr.)
Эрмени Базар / Ermeni Bazar (krim.-tat.)

Lidnanznam	Flag
Valdkund	Venäma - de fakto Ukrain - de jure]]
Eläjiden lugu (2018)	21,754 ristitud
Pind	16,2 km²
Pämez'	Igor' Nižnik (sügüz'ku 2014—)
Telefonkod	+7−36 567, ende +380−6567
Aigvö	UTC+3

Istorii

Eländpunktan aluz om pandud vl 1736 pagenuzil Ottomanan imperijaspäi grekalaižil i armenijalaižil. Oli olmas Armänskii Bazar-nimitusenke, vl 1921 udesnimitihe venäks nügüdläižikš. Sai lidnan statusad vl 1993.

Armänsk šingotase himižel tegimel, se pästab nenid substancijoid: titanan hapanduz, rikmuiktuz, mineraližed heretused, rusked raudpigment, nozol natriistökol.

Geografijan andmused

Lidn sijadase Perekopan kaglhal, Krim-regionan röunanno, 5 m ü.m.t. keskmäižel korktusel. Pohjoižkriman kanalan ojandeh läbitab lidnan keskust. Matkad Simferopolihesai om 133 km suvhe orhal, 143 km avtotedme vai raudtel. Lähembaine lidn om Krasnoperekopsk 20 km suvhe-suvipäivnouzmha orhal da kaikil teil.

Koume žilod mülüdas lidnümbrikho Armänskan ližaks. Lidnümbrikon pind — 162,4 km², se röunatab Krasnoperekopskan rajonanke suves i päivnouzmas.

Eläjad

Vl 2014 lidnan eläjiden lugu oli 21 987 ristitud, lidnümbrikon — 24 415 ristitud. Kaikiš suremb lidnan ristitišt oli 24 833 eläjad vl 1989.

Rahvahad (lidnan eläjad, enamba 0,4% vl 2014): venänikad — 57,9%, ukrainalaižed — 27,3%, totarlaižed — 1,3%, krimantatarlaižed — 1,1%, vaugedvenälaižed — 0,7%, azerbaidžanlaižed — 0,5%, korejalaižed — 0,4%, toižed rahvahad — 2,0%, rahvahuden ozutandata — 8,8%.

Irdkosketused

• Armänskan lidnümbrikon oficialine sait (armgov.ru). (ven.)
• Lidnümbrikon lehtpoled Kriman oficialižel portalal (armyansk.rk.gov.ru). (ven.)